Türkmen tenisiniň geljegi: Ýetginjekler ýygyndysy Aziýanyň iň güýçli 4 toparynyň arasyna girdi

Türkmenistanyň ýetginjekler ýygyndysy Aziýa we Okeaniýa zolagynda Dewis kubogynyň (U16) saýlama tapgyrynyň deslapky basgançagynda öz çykyşlaryny uly üstünlik bilen tamamlady. Kolombo şäherinde geçirilen bu abraýly ýaryşda ildeşlerimiz 15 komandanyň arasynda dördünji orny eýelediler. Bu bolsa ýurdumyzyň taryhynda bu turnirde gazanylan iň ýokary netijedir.

Türkmenistanyň ýygyndy toparyna meýdançada Süleýman Hudaýberdiýew, Aly Geldiýew we Kerimgeldi Guldurdyýew dagy wekilçilik etdiler. Türkmen tennisçileriniň turnir sanawyndaky ýokary basgançaklara tarap ýoly "B" toparyndaky ynamly liderlik bilen başlandy. Biziň ýetginjeklerimiz Omanyň ýygyndysyny 3:0 hasabynda derbi-dagyn etdiler, şeýle hem Mýanmanyň we Singapuryň güýçli garşydaşlarynyň üstünden uly bäsdeşlikde ýeňiş gazandylar. Çärýek finalda bolsa türkmenistanly türgenler Filippinlerden gelen deň-duşlaryny ýeňip, özleriniň ýokary ussatlyklaryny tassykladylar.

Ýaryşyň ýarym finalynda Wýetnamyň ýygyndysyna garşy we "bürünç" medal ugrundaky oýunda ýaryşyň eýeleri — Şri-Lankanyň komandasyna garşy geçirilen bäsleşiklerde uly fiziki agram düşendigine garamazdan, türgenlerimiz polat ýaly erk-isleg we ýokary ussatlyk görkezdiler hem-de medallary diňe örän çekeleşikli bäsleşikde elden berdiler.

Öziniň ýeke-täk duşuşyklarynyň altyşysyndan bäşisinde ýeňiş gazanan Aly Geldiýewiň çykyşy aýratyn bellenilmäge mynasypdyr. Ol bu netijesi bilen sebitiň tennisiniň öňdebaryjylarynyň biridigi baradaky statusyny tassyklady. Onuň topardaşlary Kerimgeldi Guldurdyýew we Süleýman Hudaýberdiýew hem özlerini mynasyp görkezdiler. Olaryň eýýäm Katar, Saud Arabystany we Taýland ýaly ýurtlarda geçirilen halkara ýaryşlarda baý tejribesi bar.

Ýaş tennisçileriň taýýarlygyna ýygyndy toparyň kapitany Gurbanberdi Gurbanberdiýew we türgenleriň şahsy tälimçileri gözegçilik etdiler. Olaryň hünär ussatlygy şu günki üstünligiň girewi boldy.

Halkara tennis federasiýasynyň (ITF) howandarlygynda 1985-nji ýyldan bäri geçirilip gelinýän ýetginjekler arasyndaky Dewis kubogy 16 ýaşyna çenli türgenler üçin resmi däl dünýä çempionaty hasaplanýar. Türkmen ýaşlarynyň Kolomboda gazanan bu ýokary netijesi diňe bir milli tennis mekdebiniň halkara abraýyny berkitmek bilen çäklenmän, eýsem, bu sport görnüşiniň Türkmenistanda mundan beýläk-de ösmegine güýçli itergi berer.

Ýetginjekleriň gazanan bu üstünligi ýurdumyzyň ýaşlar sportuny goldamak we milli ýygyndy toparlar üçin ätiýaçlyk türgenleri taýýarlamak boýunça döwlet strategiýasynyň netijeliligini tassyklaýar.