Anvar Ibrohim: «Petronas» dekabr oyida Turkmanistonda burg‘ilash ishlarini boshlaydi
Malayziyaning «Petronas» kompaniyasi Turkmanistondagi yirik gaz konlarida qidiruv va burg‘ilash ishlarini joriy yilning dekabr oyida boshlashga tayyorgarlik ko‘rmoqda. Bu haqda Malayziya Bosh vaziri Datuk Seri Anvar Ibrohim parlamentdagi chiqishida ma’lum qildi.
Bosh vazirning ta’kidlashicha, ushbu loyiha energetika sohasida eng tez tayyorlangan va amalga oshirilayotgan ishlar qatoriga kiradi. Odatda, shartnoma imzolangandan so‘ng burg‘ilash ishlarini boshlash uchun bir yarim yildan ikki yilgacha vaqt talab qilinar edi, ammo «Petronas» bu muddatni sezilarli darajada qisqartirishga erishdi.
Anvar Ibrohim Turkmanistondagi gaz konlarining o‘zlashtirilishini Malayziya uchun juda muhim voqea deb ta’rifladi. Uning so‘zlariga ko‘ra, bu qadam Malayziyani dunyoda tabiiy gaz zaxiralarini saqlaydigan yetakchi davlatlar qatoriga qo‘shadi va mamlakat energetika xavfsizligini ta’minlash strategiyasining asosiy qismi bo‘ladi.
Malayziya hukumati hozirgi vaqtda energiya manbalarini diversifikatsiya qilish, neft mahsulotlari ta’minotini barqaror saqlash hamda narxlarni nazorat qilish bo‘yicha izchil chora-tadbirlarni amalga oshirmoqda. Bosh vazir mamlakatda energiya ta’minoti ayni damda yetarli darajada ekanligini va hukumat sanoat sohasini, shu jumladan kichik va o‘rta tadbirkorlikni qo‘llab-quvvatlashga qaratilgan uzoq muddatli strategiyasini davom ettirishini ta’kidladi.
