2026-yil 18-oktabr kuni Ashxobod shahrida Turkmaniston va Hindiston Respublikasi o‘rtasidagi savdo-iqtisodiy aloqalarni rivojlantirishga bag‘ishlangan biznes-forum bo‘lib o‘tdi. Tadbir Turkmanistondagi Hindiston elchixonasi hamda Turkmaniston Savdo-sanoat palatasi tomonidan birgalikda tashkil etildi.

Forumning asosiy maqsadi ikki mamlakat o‘rtasidagi tovar ayirboshlash hajmini oshirish istiqbollarini muhokama qilish va investitsiyaviy hamkorlikni faollashtirishdan iborat bo‘ldi.

Tadbirda Turkmaniston Savdo-sanoat palatasi raisining o‘rinbosari Azat Nazarov, Hindistonning Turkmanistondagi Favqulodda va Muxtor elchisi Bandaru Wilsonbabu, hind diasporasi vakillari, ommaviy axborot vositalari xodimlari, shuningdek, tog‘-kon sanoati va farmatsevtika, qishloq xo‘jaligi, transport, bank ishi hamda qurilish sohalarida faoliyat yurituvchi 30 dan ortiq yetakchi hind kompaniyalarining rahbarlari va yuqori lavozimli menejerlari ishtirok etdilar.

Forumda so‘zga chiqqan Hindiston elchisi Bandaru Wilsonbabu Turkmaniston bozorining hindistonlik investorlar uchun jozibador ekanini ta’kidladi. Uning aytishicha, so‘nggi o‘n ikki yil davomida amalga oshirilgan iqtisodiy islohotlar natijasida Hindiston yalpi ichki mahsulotining o‘sish sur’ati taxminan 7,5 foizga yetmoqda. U Hindiston dunyodagi eng tez rivojlanayotgan iqtisodiyotlardan biri ekanini va yaqin kelajakda dunyoning uchinchi yirik iqtisodiyotiga aylanishni maqsad qilganini qayd etdi.

Diplomatning ta’kidlashicha, Hindiston Turkmanistonga do‘stona va ishonchli hamkor sifatida qaraydi. Ikki mamlakat o‘rtasida tarixiy, madaniy va sivilizatsiyaviy aloqalar mavjud. U Hindiston Bosh vaziri Narendra Modi, Turkmaniston Prezidenti Serdar Berdimuhamedov hamda turkman xalqining Milliy Lideri Gurbanguly Berdimuhamedov rahbarligida ikki mamlakat o‘rtasidagi hamkorlik kelgusida yanada rivojlanishiga ishonch bildirdi.

Turkmaniston Savdo-sanoat palatasi raisining o‘rinbosari Azat Nazarov ham o‘zaro savdo hajmini oshirish va yangi qo‘shma loyihalarni amalga oshirish muhimligini ta’kidladi.

Forumda savdo-iqtisodiy hamda ilmiy-texnikaviy hamkorlik bo‘yicha Turkmaniston–Hindiston hukumatlararo komissiyasining faoliyati ikki mamlakat ishbilarmon doiralari o‘rtasidagi aloqalarni muvofiqlashtirish va faollashtirishning muhim vositalaridan biri sifatida qayd etildi.

O‘tkazilgan forum Turkmaniston va Hindiston ishbilarmon doiralarining uzoq muddatli, barqaror va o‘zaro manfaatli hamkorlikni rivojlantirishga bo‘lgan qiziqishini yana bir bor namoyon etdi.