Bolqon viloyatidagi yangi avtoyo‘l bir kecha-kunduzda 14 ming avtomobilni qabul qilish quvvatiga ega bo‘ladi
Turkmanistonning g‘arbiy mintaqasida xalqaro va mintaqalararo ahamiyatga ega bo‘lgan yangi transport yo‘lagi qurilishi jadal sur’atlar bilan davom etmoqda. Bolqon viloyati hududida barpo etilayotgan «Turkmanboshi — Qorabog‘oz — Qozog‘iston chegarasi» avtomobil yo‘li to‘liq foydalanishga topshirilgach, soatiga 580 tagacha, bir kecha-kunduz davomida esa 14 mingtagacha avtomobilga yuqori sifatli xizmat ko‘rsatish quvvatiga ega bo‘ladi. Bu haqda «Turkmanistan» gazetasida batafsil ma’lumot berilgan.
Ushbu yirik hajmdagi infratuzilmaviy loyiha Turkmaniston Sanoatchilar va tadbirkorlar ittifoqi a’zosi — «Altyn nesil» xo‘jalik jamiyati tomonidan amalga oshirilmoqda. Umumiy uzunligi 250 kilometrga yaqin bo‘lgan yangi avtomobil yo‘lining qurilish ishlarini to‘liq yakunlash va uni 2028-yilda foydalanishga topshirish rejalashtirilgan.
Zamonaviy talablarga muvofiq qurilayotgan ushbu yo‘l bo‘yida yo‘lovchilar va haydovchilar uchun barcha qulay shart-sharoitlar yaratiladi. Loyihaga ko‘ra, yo‘l yoqasida 8 ta zamonaviy avtobus bekati, bir nechta yoqilg‘i quyish shoxobchalari, shuningdek, zarur bo‘lgan ko‘plab ijtimoiy maqsadlardagi ob’yektlar quriladi.
Harakatlanish va xavfsizlikning yuqori darajasini ta’minlash maqsadida, avtoyo‘lning qarama-qarshi harakatlanish yo‘laklari bir-biridan maxsus beton to‘siqlar orqali himoyalanib ajratiladi. Bundan tashqari, yo‘lning ikki tomonida ham transport vositalarining ishonchli harakatini ta’minlash uchun uzluksiz himoya panjaralari o‘rnatiladi.
Ushbu yangi avtoyo‘l mamlakatimizning tranzit-transport imkoniyatlarini yanada kengaytirishda va qo‘shni davlatlar bilan iqtisodiy aloqalarni mustahkamlashda muhim o‘rin tutadi.
