Germaniya Federativ Respublikasining Ashxoboddagi elchixonasi Huquqiy va konsullik bo‘limida vaqtinchalik ishlash uchun yangi xodim izlayotganini ma’lum qildi. Bu haqda elchixonaning rasmiy Instagram sahifasida xabar berildi.

Ma’lumotlarga ko‘ra, yangi xodim 2027-yilning yanvar-aprel oylarida faoliyat yuritadi. U bola parvarishi ta’tiliga chiqayotgan mutaxassisning o‘rnini vaqtincha egallaydi.

Ishga qabul qilinadigan mutaxassisning asosiy vazifalari qatoriga elchixonaga murojaat qilgan fuqarolarni qabul qilish, ular bilan nemis, turkman va rus tillarida muloqot qilish, shuningdek, viza olish uchun topshirilgan arizalarni qabul qilish va ko‘rib chiqish kiradi.

Bundan tashqari, xodimdan ariza beruvchilar bilan elektron pochta va telefon orqali bog‘lanish, viza hujjatlarini arxivlashtirish kabi ishlarni bajarish talab etiladi.

Nomzodlar zarur hujjatlarni 2026-yil 24-noyabrga qadar topshirishlari lozim. Ishga qabul qilish shartlari va nomzodlarga qo‘yiladigan boshqa talablar bilan Germaniyaning Ashxoboddagi elchixonasi rasmiy internet sayti orqali tanishish mumkin.