Turkmaniston Atrof-muhitni muhofaza qilish vazirligida «Koʻhitangning karstlari, kanyonlari va gʻorlari» nomli transchegaraviy tabiiy obyektni YuNESKOning Butunjahon merosi roʻyxatiga kiritish boʻyicha tayyorlanayotgan nomzodnoma hujjati yuzasidan gibrid shaklda maslahatlashuv yigʻilishi oʻtkazildi. Uchrashuvda Mixael Zukkov nomidagi Tabiatni muhofaza qilish jamgʻarmasi, Conservation X Labs tashkiloti, Slovakiya speleologiya jamiyati, Berlin Gumboldt universiteti, Oʻzbekiston Ekologiya va atrof-muhitni muhofaza qilish milliy qoʻmitasi, Oʻzbekiston Fanlar akademiyasi Zoologiya instituti, Turkmanistonning YuNESKO ishlari boʻyicha milliy guruhi sekretariati, shuningdek, Turkmaniston Atrof-muhitni muhofaza qilish vazirligining Choʻllar, oʻsimlik va hayvonot dunyosi milliy instituti vakillari qatnashdilar. Uchrashuvda obyekt boʻyicha tayyorlangan «Yoʻl xaritasi»ning bajarilishi hamda 2026-yil bahorida Turkmanistonning Koʻhitang davlat qoʻriqxonasida va Oʻzbekistonning Surxon davlat qoʻriqxonasida oʻtkazilgan dala tadqiqotlari natijalari koʻrib chiqildi. Xalqaro ekspertlar YuNESKOning Butunjahon merosi roʻyxatiga kiritilgan boshqa mamlakatlardagi dinozavr izlarining suratlarini koʻrsatib, ularni Turkmanistonda aniqlangan izlar bilan taqqosladilar. Shuningdek, xalqaro darajada eʼtirof etilishga munosib topilgan Turkmaniston va Oʻzbekiston gʻorlariga tegishli fotosuratlar bilan tanishtirildi. Yigʻilishda obyekt boʻyicha Dastlabki baholash (Preliminary Assessment) uchun ariza tayyorlash masalasiga alohida eʼtibor qaratildi. Ushbu bosqich obyektning chegaralarini belgilash, uning asosiy xususiyatlari va qadriyatlarini aniqlash, yuzaga kelishi mumkin boʻlgan xavflarni tahlil qilish, hududni boshqarish bilan bogʻliq masalalarni hamda hujjatlarni YuNESKOning Butunjahon merosi qoʻmitasi bilan kelishish va unga topshirish tartibini oʻz ichiga oladi. Turkmaniston va Oʻzbekistonning qoʻshma Dastlabki roʻyxati (Tentative List) 2025-yil sentyabr oyida YuNESKOning Butunjahon merosi qoʻmitasiga taqdim etilgan edi. Konvensiyaning yangilangan Amal qilish qoʻllanmasiga muvofiq, toʻliq nomzodnoma hujjati topshirilishidan oldin ishtirokchi davlatlar Dastlabki baholash bosqichidan oʻtishlari shart. Tabiatni muhofaza qilish xalqaro hamjamiyatining (IUCN) ekspertlaridan ijobiy natija olingandan soʻng, tomonlar toʻliq nomzodnoma boʻyicha hujjatlar toʻplamini tayyorlash va taqdim etish ishlariga kirishishlari mumkin. Milliy ekspertlar bundan buyon ham Mixael Zukkov nomidagi Tabiatni muhofaza qilish jamgʻarmasining xalqaro maslahatchilari va oʻzbekistonlik mutaxassislar bilan birgalikda YuNESKOning Butunjahon merisini muhofaza qilish toʻgʻrisidagi konvensiyasining yangi talablarini hisobga olgan holda tegishli ishlarni davom ettiradiler.