Maxtumquli nomidagi Turkman davlat universitetining rus tili va adabiyoti mutaxassisligining 2-kurs talabasi Guljemal Sadyyeva xalqaro intellektual tanlovda yuqori natija ko‘rsatib, g‘oliblar safidan joy oldi.

MilliInfo saytining xabar berishicha, tanlov A.S. Pushkin nomidagi Davlat rus tili instituti hamda «Russkiy mir» jamg‘armasi homiyligida 2026-yilning 1-iyunidan 26-iyuliga qadar onlayn shaklda o‘tkazildi. Unda dunyoning 28 davlatidan 786 nafar talaba ishtirok etdi.

Saralash bosqichi natijalariga ko‘ra eng yuqori natija ko‘rsatgan 20 nafar qatnashchi aniqlanib, ularning orasida Turkmaniston vakili Guljemal Sadyyeva ham bor edi. Bu muvaffaqiyat talabaning tayyorgarligi va uning ilmiy rahbarining mehnati mahsuli sifatida e'tirof etiladi.

Tanlov g‘oliblari Rossiya poytaxtida o‘tkazilayotgan maxsus til o‘quv kursida qatnashish imkoniyatini qo‘lga kiritdilar. 23-avgustdan 5-sentabrgacha Moskvada «Iste'dodli chet ellik talabalar uchun “Pushkin bilan yoz”» deb nomlangan («Pushkin Camp») til amaliyoti dasturi o‘tkazilmoqda.

O‘quv dasturi doirasida ishtirokchilar umumiy darslarga, tajribali filologlarning interaktiv o‘quv-seminarlariga qatnashadilar. Shuningdek, ular uchun Rossiya madaniyati va adabiy merosi bilan tanishish imkonini beruvchi turli madaniy-ma'rifiy tadbirlar tashkil etiladi.