"Tarim" neft koni Xitoyning energiya xavfsizligini ta'minlashda muhim o'rin tutadi
Xitoy Milliy neft korporatsiyasi (CNPC) ma'lumotlariga ko'ra, Shinjon-Uyg'ur avtonom rayonida joylashgan "Tarim" neft-gaz konidan "G'arb–Sharq" gaz quvuri orqali Xitoyning sharqiy hududlariga yetkazib berilgan tabiiy gaz hajmi 400 milliard kub metrdan oshdi.
Ushbu yirik energiya loyihasi 22 yil davomida o'zining samaradorligini isbotlab, mamlakat sharqidagi zavodlar va millionlab oilalarning uylarini ishonchli energiya manbai bilan ta'minlab kelmoqda. Hozirgi vaqtda ushbu kondan har soatda 2 million kub metrdan ortiq tabiiy gaz Yanszi daryosi deltasi va boshqa sharqiy viloyatlar uchun yo'naltirilmoqda.
Ishlab chiqarish quvvatining uzluksiz ortishi
"Tarim" neft-gaz konining muvaffaqiyatlari, birinchi navbatda, qidiruv va o'zlashtirish ishlarining samarali tashkil etilganligi bilan bog'liq. Xususan, "Kela-2" gaz konida gaz qazib olishning barqaror ortishi va yangi o'ta chuqur quduqlarning ishga tushirilishi katta hissa qo'shdi. O'tkazilgan qidiruvlar natijasida "Kela-Keshen" va "Bozi-Dabey" kabi trillion kub metr zaxiraga ega ikki yirik gazli zona topildi. Natijada, "Kela-Keshen" konining tasdiqlangan geologik zaxiralari 1 trillion kub metrdan oshdi.
Konnin texnik imkoniyatlarini oshirish maqsadida Luntay tumanidagi Lunnan gaz taqsimlash stansiyasini kengaytirishning uch bosqichi muvaffaqiyatli yakunlandi. Ushbu stansiya turli gaz manbalarini asosiy quvur tizimiga birlashtiruvchi markaz sifatida gaz quvurlari tizimining umumiy o'tkazuvchanlik qobiliyatini sezilarli darajada oshirdi.
Energetika va ekologik barqarorlik
Xitoyning eng yirik neft-gaz havzasi bo'lgan "Tarim" cho'kmaligi mamlakat umumiy tabiiy gaz ishlab chiqarishining oltidan bir qismini o'zida jamlaydi. So'nggi olti yil davomida bu yerda yillik gaz qazib olish izchil ravishda 31 milliard kub metrdan yuqori bo'lgan barqaror ishlab chiqarish darajasi saqlanib qolmoqda.
Umumiy uzunligi 8700 kilometrdan ortiq bo'lgan "G'arb–Sharq" gaz quvuri nafaqat energiya ta'minoti, balki ekologik jihatdan ham muhim ahamiyatga ega. Tabiiy gazdan ko'mir o'rniga keng foydalanilishi mamlakatda uglerod chiqindilarining kamayishiga va atrof-muhitni muhofaza qilishga qaratilgan dasturlarning amalga oshirilishiga katta yordam bermoqda.
