Turkmaniston aloqa vaziri Shanxaydagi Butunjahon sun'iy intellekt konferensiyasida ishtirok etdi
Turkmaniston aloqa vaziri Hajimurat Hudaygulyyev 17–20-iyul kunlari Shanxay shahrida oʻtkazilayotgan Butunjahon sun'iy intellekt konferensiyasi (WAIC 2026) doirasida mamlakatda Sun'iy intellekt boʻyicha milliy strategiyani ishlab chiqish yoʻlida faol ish olib borilayotganini aytdi. Uning ta'kidlashicha, ushbu hujjat innovatsiyalarni joriy etish, yuqori malakali kadrlarni tayyorlash va ilmiy-tadqiqot ishlarini rivojlantirish uchun asosiy poydevor boʻladi.
«Yorqin kelajak uchun sun'iy intellekt sohasida hamkorlik» deb nomlangan forumda soʻzga chiqqan Hudaygulyyev Prezident Serdar Berdimuhamedov rahbarligida mamlakatda raqamli islohotlar boʻyicha davlat siyosati izchil amalga oshirilayotganini aytdi. Uning soʻzlariga koʻra, bu yoʻnalishda infratuzilma modernizatsiya qilinmoqda, raqamli iqtisodiyot rivojlantirilmoqda va me'yoriy-huquqiy baza takomillashtirilmoqda.
Vazirning ta'kidlashicha, tayyorlanayotgan Strategiyada xalqaro standartlarga muvofiq xavfsizlik, etika, shaxsiy ma'lumotlarni himoya qilish hamda algoritmlarning shaffofligi masalalariga alohida ahamiyat berilmoqda. Shuningdek, u sun'iy intellekt sogʻliqni saqlash, ta'lim, transport tizimlarini modernizatsiya qilishda, suv resurslarini samarali boshqarishda va atrof-muhitni muhofaza qilishda ulkan imkoniyatlar ochishini ta'kidladi.
Hudaygulyyev Turkmaniston raqamli infratuzilmani rivojlantirish, zamonaviy ma'lumotlarni qayta ishlash markazlarini yaratish, qoʻshma ilmiy loyihalarni amalga oshirish hamda sun'iy intellekt texnologiyalaridan mas'uliyatli, xavfsiz va axloqiy me'yorlarga muvofiq foydalanishni ilgari surish yoʻlida manfaatdor hamkorlar bilan faol hamkorlik qilishga tayyorligini bildirdi.
«Sun'iy intellektning kelajagi hamkorlikka va umumiy mas'uliyatga asoslanishi kerak. Davlatlar, ilmiy jamoatchilik va biznes sa'y-harakatlarini birlashtirgan taqdirda, biz ushbu texnologiyalarni insoniyat manfaati, tinchlik va xavfsizlikni mustahkamlashga yoʻnaltira olamiz», — dedi vazir va forum tashkil etilgani uchun Xitoy Hukumatiga minnatdorlik bildirdi.
