Turkmaniston davlat vaziri, «Türkmengaz» davlat konserni raisi Maksat Babayev Gaz eksport qiluvchi mamlakatlar forumi a’zo davlatlari va hukumatlari rahbarlarining VIII sammiti yalpi majlisida ishtirok etdi. Xalqaro uchrashuv Moskva shahridagi Xalqaro savdo markazida bo‘lib o‘tdi.

Rossiya Federatsiyasi Prezidenti Vladimir Putin raisligida o‘tgan sammitda Eron Prezidenti Masud Pezeshkiyon, Qatar amiri shayx Tamim bin Hamad Ol Soniy, Mozambik Prezidenti Daniel Shapu, Ekvatorial Gvineya Prezidenti Teodoro Obiang Ngema Mbasogo hamda Liviya Prezident kengashi raisi Muhammad al-Manfiy qatnashdi.

Gaz eksport qiluvchi mamlakatlar forumi gaz sohasida xalqaro hamkorlikni rivojlantirish, tajriba almashish, jahon gaz bozori holatini baholash va uning rivojlanish yo‘nalishlarini tahlil qilishga qaratilgan hukumatlararo tashkilot hisoblanadi. Uning tarkibiga Jazoir, Boliviya, Misr, Ekvatorial Gvineya, Eron, Liviya, Nigeriya, Qatar, Rossiya, Trinidad va Tobago, Birlashgan Arab Amirliklari hamda Venesuela kiradi.

Forum bundan 25 yil avval gaz bozori mutaxassislarining fikr almashishi, soha rivojlanish tendensiyalarini o‘rganishi va kelgusi yo‘nalishlarni prognoz qilishi uchun tahliliy maydoncha sifatida tashkil etilgan. Shundan buyon ishtirokchi mamlakatlar o‘rtasida ochiq muloqotni rivojlantirish, bozorga oid ma’lumotlarni almashish va gaz sanoati taraqqiyotiga ta’sir ko‘rsatuvchi omillarni birgalikda baholash uning asosiy vazifalari qatoridan o‘rin olgan.

Forumning ahamiyati unga a’zo davlatlarning jahon gaz bozoridagi o‘rnida ham namoyon bo‘ladi. Ushbu mamlakatlar dunyo tabiiy gaz zaxiralarining qariyb 70 foiziga va tabiiy gaz eksportining deyarli 40 foiziga ega.

Turkmanistonning sammitda ishtirok etishi gaz sohasidagi xalqaro hamkorlik masalalarini muhokama qilish, jahon energetika bozoridagi tendensiyalarni o‘rganish va gaz sanoatida o‘zaro hamkorlikni rivojlantirishga hissa qo‘shish uchun muhim imkoniyatdir.