Qalmog‘iston poytaxti Elista shahrida Kaspiy mintaqasidagi suv tanqisligi va cho‘llanish muammolariga bag‘ishlangan xalqaro ekspertlar muloqoti bo‘lib o‘tmoqda. B. B. Gorodovikov nomidagi Qalmoq davlat universitetida tashkil etilgan «Global o‘zgarishlar va suv tanqisligi sharoitida Kaspiy mintaqasi: barqarorlikni oshirish tashabbuslari va yo‘llari» mavzusidagi xalqaro ilmiy-amaliy konferensiyada Ozarbayjon, Eron, Qozog‘iston, Rossiya, Turkmaniston va O‘zbekistonning olimlari, ekologlari hamda tegishli soha mutaxassislari qatnashmoqda. Turkmaniston delegatsiyasi forumda onlayn tarzda ishtirok etmoqda.

Rossiya Fan va oliy ta’lim vazirligi nazorati ostida o‘tkazilayotgan ushbu tadbir Tehronda bo‘lib o‘tgan III Kaspiy iqtisodiy forumida davlat rahbarlari erishgan kelishuvlarni amalda ro‘yobga chiqarish doirasida tashkil etildi.

Konferensiyada suv tanqisligi, qurg‘oqchil hududlarning o‘zgarayotgan iqlim sharoitlariga moslashuvi, «Shimol — Janub» xalqaro transport yo‘lagini rivojlantirish, qishloq xo‘jaligida biotexnologiyalardan foydalanish va ekologik xavfsizlik kabi o‘zaro bog‘liq masalalar muhokama qilinmoqda. Ishtirokchilar Kaspiy dengizi yagona ekotizim ekanini hisobga olib, mintaqadagi ekologik muammolarni hal etishda sohilbo‘yi davlatlarining birgalikdagi sa’y-harakatlari muhimligini ta’kidlamoqda.

Konferensiya dasturida suvni tozalashning innovatsion texnologiyalarini joriy etish, tuproq degradatsiyasiga qarshi kurashish va Kaspiybo‘yi hududlari aholisining salomatligini monitoring qilish masalalariga alohida e’tibor qaratilgan.

Shuningdek, akademik hamkorlikni rivojlantirish va yosh olimlarni qo‘llab-quvvatlash masalalari ham ko‘rib chiqilmoqda. Kaspiy universitetlari va ilmiy-tadqiqot markazlari assotsiatsiyasi talabalarning ilmiy guruhlari uchun maxsus stipendiya dasturini tashkil etish tashabbusini ilgari surdi.

Konferensiya yakunlari bo‘yicha ishlab chiqiladigan takliflar va qo‘shma ilmiy tadqiqotlar bo‘yicha kelishuvlar Kaspiy havzasining biologik boyliklarini saqlash hamda mintaqaning barqaror rivojlanishini ta’minlash uchun ilmiy asos yaratishi kutilmoqda.