Turkmanistonda 59 ta xorijiy ommaviy axborot vositasi vakili rasmiy ro‘yxatdan o‘tdi
Turkmaniston Tashqi ishlar vazirligi huzurida dunyoning turli mamlakatlaridan jami 59 ta xorijiy ommaviy axborot vositalari (OAV) jurnalistlari hamda muxbirlari akkreditatsiyadan (rasmiy ro‘yxatdan) o‘tdi. Turkmaniston tashqi siyosat mahkamasining rasmiy veb-saytida berilgan ma’lumotga ko‘ra, dunyoning eng nufuzli xalqaro media tashkilotlari vakillari yurtimizda rasmiy ravishda ro‘yxatga olinib, ayni paytda o‘z kasbiy faoliyatlarini to‘siqlarsiz davom ettirmoqdalar.
Ushbu ko‘rsatkich Turkmanistonning global axborot maydoniga faol integratsiyalashayotganini, xorijiy ommaviy axborot vositalari uchun ochiqlik va o‘zaro manfaatli hamkorlik sharoitlari ta’minlanayotganini yaqqol ko‘rsatadi.
Turkmaniston hududida rasmiy ravishda faoliyat yuritayotgan media tashkilotlari tarkibida global axborot agentliklari, yirik teleradiokompaniyalar, shuningdek, ixtisoslashtirilgan elektron nashrlar mavjud. Ro‘yxatga olingan asosiy xalqaro media tashkilotlari qatorida quyidagilar bor:
- Global axborot agentliklari: «Reuters» (Buyuk Britaniya), «Associated Press» (AQSh), «Agence France-Presse» (Fransiya), «Sinxua» (Xitoy), «TASS» va «Interfaks» (Rossiya), «Trend» hamda «AzerTAj» (Ozarbayjon), «Arminfo» (Armaniston), «NCA» agentligi.
- Xalqaro teleradiokompaniyalar va telekanallar: «TRT» (Turkiya), «Rossiya 24» va «Russia Today» (Rossiya), «Xabar24» (Qozog‘iston), Xitoy xalqaro radiosi, Armaniston Jamoat telemuloqoti, «Ozarbayjon televideniyesi va radiosi» YoAJning Markaziy Osiyo bo‘yicha byurosi.
- Nufuzli jurnallar va internet nashrlari: «Bruxelles Korner» (Belgiya), «Business Central Asia» (Hindiston), «Diplomatic world» va «Society» diplomatik jurnallari, «Atawatan Turkmenistan» jurnali, «Turkmenistan.ru» internet gazetasi, «NewsDay Georgia» agentligi, «Bakinskiy rabochiy» gazetasi, «Kazinform» xalqaro axborot agentligi, «Galkynyş» turkman-avstriya jurnali, shuningdek, Ruminiyaning «Bucuresti Business» va «Prahovo Business» internet saytlari.
Yurtimizda xorijlik jurnalistlarning professional faoliyat olib borishlari uchun yaratilayotgan keng imkoniyatlar Turkmanistonda amalga oshirilayotgan keng ko‘lamli islohotlar, xalqaro tashabbuslar va mintaqaviy ahamiyatga ega yirik loyihalarning jahon jamoatchiligiga tezkor va xolis yetkazilishiga ulkan hissa qo‘shmoqda.
