2026-yilning dastlabki to‘qqiz oyida «Türkmennebit» davlat konsernining Turkmanboshi neftni qayta ishlash zavodlari majmuasida 40 ming 617 tonna polipropilen ishlab chiqarilib, iste’molchilarga yetkazib berildi.

«Ussatnews.com» nashrining xabar berishicha, mamlakatda yuqori sifatli polipropilenga bo‘lgan talab izchil ortib bormoqda. Ushbu mahsulotning asosiy xaridorlari qatorida Turkmaniston Sanoatchilar va tadbirkorlar birlashmasi a’zolari ham bor.

So‘nggi paytlarda Turkmaniston do‘konlari va bozorlarida mahalliy polipropilendan tayyorlangan turli xil milliy mahsulotlarni tobora ko‘proq uchratish mumkin.

Polipropilen kimyo sanoatining muhim mahsulotlaridan biri bo‘lib, turli tovarlar va ishlab chiqarish materiallarini tayyorlashda qo‘llaniladi. Unga bo‘lgan ichki talabning ortishi mahalliy xomashyoni qayta ishlash hamda milliy ishlab chiqarishni rivojlantirishga qiziqish kuchayib borayotganini ko‘rsatadi.