Valentina Matviyenko Avazada oʻtkaziladigan xalqaro tadbirlarga taklif qilindi
Sankt-Peterburg shahrida oʻtkazilayotgan Mustaqil Davlatlar Hamdoʻstligi Parlamentlararo Assambleyasining (MDH PA) 60-yalpi majlisi va Assambleya Kengashining navbatdagi yigʻilishi doirasida Turkmaniston Majlisi Raisi D. Gulmanova va Rossiya Federatsiyasi Federal Majlisi Federatsiya Kengashi Raisi Valentina Matviyenko oʻrtasida ikki tomonlama uchrashuv boʻlib oʻtdi.
Uchrashuv davomida tomonlar ikki davlat rahbarlarining siyosiy saʼy-harakatlari natijasida Turkmaniston va Rossiya Federatsiyasi oʻrtasidagi munosabatlar strategik hamkorlik xususiyatiga ega ekanligini taʼkidladilar. Shuningdek, koʻp yillik boy tajribaga asoslangan turkman-rossiya hamkorligi siyosiy, savdo-iqtisodiy va madaniy-gumanitar yoʻnalishlarda izchil rivojlanib borayotgani, bunga esa parlamentlararo aloqalar katta turtki berayotgani qayd etildi.
Muzokaralar davomida qonunchilik sohasida tajriba almashish, parlamentlararo doʻstlik guruhlari faoliyatini faollashtirish, shuningdek, xalqaro parlament maydonlarida bir-birlarining tashabbuslarini oʻzaro qoʻllab-quvvatlash muhimligiga eʼtibor qaratildi.
Uchrashuv yakunida Turkmaniston Majlisi Raisi D. Gulmanova Federatsiya Kengashi Raisi V. Matviyenkoni Turkmanistonning MDHda hamda Markaziy Osiyo mamlakatlari va Ozarbayjon Respublikasi davlat rahbarlarining Maslahat uchrashuvida raislik qilishi doirasida «Avaza» milliy sayyohlik zonasida oʻtkazilishi rejalashtirilgan xalqaro tadbirlarda ishtirok etishga taklif qildi.
Rossiya parlamenti yuqori palatasi rahbari taklif uchun minnatdorlik bildirib, tomonlar manfaatlariga mos keladigan samarali aloqalarni yanada chuqurlashtirishga tayyor ekanliklarini tasdiqladi.
