Turkmanistonda Saylovlarni va referendumlarni o‘tkazish bo‘yicha markaziy komissiyaning majlisi

Kecha Turkmanistonda Saylovlarni va referendumlarni o‘tkazish bo‘yicha markaziy komissiyaning majlisi bo‘lib o‘tdi. Unda mamlakatimizda yangi tashkil etilgan tumanlarning xalq maslahatlari a’zoligiga hamda vakolat muddati tugashidan oldin bo‘shab qolgan Turkmaniston Mejlisi deputatlari, viloyat, tuman, shahar xalq maslahatlari va Kengashlar a’zolari o‘rniga 29-mart kuni o‘tkazilgan saylovlarning yakuniy natijalari sarhisob qilindi, tasdiqlandi va e’lon qilindi. Majlisda markaziy saylov komissiyasi a’zolari, tegishli ishchi guruhlar vakillari, milliy kuzatuvchilar va ommaviy axborot vositalari vakillari ishtirok etdi.

Majlisda ta’kidlanganidek, saylovlar keng raqobat, ochiqlik va oshkoralik tamoyillari asosida o‘tdi. Bu Turkmanistonning demokratik rivojlanish yo‘liga, Qahramon Arkadag‘imiz tomonidan poydevori qo‘yilgan va hurmatli Prezidentimiz rahbarligida muvaffaqiyatli amalga oshirilayotgan siyosiy yo‘nalishga sodiqligini navbatdagi bor tasdiqladi. Ushbu strategiya davlat va jamiyat hayotining barcha sohalarida keng ko‘lamli islohotlarni amalga oshirishni nazarda tutadi. Saylovoldi kampaniyasining barcha bosqichlari o‘z vaqtida, milliy saylov qonunchiligi talablariga va umume’tirof etilgan xalqaro standartlarga muvofiq tashkil etildi. Saylov kampaniyasi davomida va saylov kuni saylovchilarning yuqori faollik ko‘rsatishi ushbu ijtimoiy-siyosiy tadbirning o‘ziga xos xususiyati bo‘ldi.

Majlis davomida viloyatlar va Ashxobod shahri saylov komissiyalari raislarining saylov natijalari to‘g‘risidagi hisobotlari tinglandi. Saylov kodeksiga muvofiq va demokratik standartlarga tayangan holda, 363 ta saylov okrugida tegishli saylov komissiyalari tomonidan 759 nafar nomzod ro‘yxatga olindi. Barcha saylov okruglarida har bir o‘rin uchun ikki yoki undan ortiq nomzod bellashdi. Kun tartibidagi asosiy masala — saylovlarning yakuniy natijalarini sarhisob qilish, tasdiqlash va e’lon qilish masalasiga e’tibor qaratilib, poytaxt va viloyat saylov komissiyalari bayonnomalaridagi ma’lumotlarga asoslanib quyidagilar e’lon qilindi: yangi tashkil etilgan tumanlar xalq maslahatlari a’zoligiga 285 nomzoddan 140 nafari, Mejlis deputatligiga 14 nomzoddan 5 nafari, viloyat va Ashxobod shahar xalq maslahatlari a’zoligiga 9 nomzoddan 3 nafari, tuman va shahar xalq maslahatlari a’zoligiga 25 nomzoddan 12 nafari, Kengashlar a’zoligiga 426 nomzoddan 203 nafari saylandi.

Uchrashuv ishtirokchilari saylovlar jarayonini kuzatgan milliy kuzatuvchilar ishini va saylovlarning yuqori tashkiliy darajada o‘tganini e’tirof etdilar. Shuningdek, saylov mavsumi davomida OAV vakillari aholini ma’lumotlar bilan ta’minlashda samarali mehnat qilganliklari ta’kidlandi. Barcha saylov uchastkalari zamonaviy aloqa vositalari bilan jihozlangani tufayli ma’lumotlarning Markaziy saylov komissiyasiga o‘z vaqtida yetkazilishi ta’minlandi. Saylov kodeksi qoidalariga ko‘ra, saylov natijalari qisqa vaqt ichida OAV orqali aholi e’tiboriga havola etiladi.

Majlis yakunida ishtirokchilar saylovlar amaldagi milliy saylov qonunchiligiga va xalqaro huquqning umume’tirof etilgan normalariga muvofiq o‘tkazilganini tasdiqladilar.