Saglyk ulgamynyň beýik ösüşleri
Geçen 2024-nji ýylda, Türkmenistanyň Saglygy goraýyş we derman senagaty işgärleriniň güni mynasybetli, paýtagtymyzda ýokary tehnologiýalar bilen üpjün edilen täze lukmançylyk merkezleriniň — 400 orunlyk Halkara sagaldyş-dikeldiş merkeziniň we 250 orunlyk Halkara fiziologiýa ylmy-kliniki merkeziniň açylyş dabarasy boldy. Bu merkezleriň açylmagy Arkadag Gahrymanymyzyň gatnaşmagynda geçirilip, olaryň ýokary binagärlik we tehnologiýa derejesi halkara güwänamalar bilen tassyklanyldy.
Bu merkezler dünýä ülňülerine laýyk gelýän enjamlar bilen üpjün edilip, Germaniýanyň “German Design Council” guramasy tarapyndan “German Design Award Winner 2025” baýragyna mynasyp boldy. Olar diňe bir saglyk hyzmatlarynyň ýokary hilli ýerine ýetirilmegi bilen däl, eýsem, ekologik taýdan arassa we howpsuz lukmançylyk enjamlary bilen hem tapawutlanýar.
Halkymyzyň saglygyny berkitmek maksady bilen, bu täze merkezlerde döredilen şertler raýatlarymyzyň saglygyny goramak, sagdyn durmuş ýörelgelerini ornaşdyrmak, ýokary hilli lukmançylyk hyzmatlaryny elýeterli etmek ugrunda uly mümkinçilikleri döredýär.
Saglygy goraýyş ulgamyndaky bu üstünlikler hormatly Prezidentimiziň we Gahryman Arkadagymyzyň öňdengörüjilikli syýasatlarynyň miwesidir. Olar halkymyzyň abadançylygyny üpjün etmekde möhüm ähmiýete eýe bolup durýar.
