2026-njy ýylyň ýanwar–iýul aýlarynda Azerbaýjana 17 müňden gowrak türkmenistanly syýahatçy baryp gördi. Bu barada «Report» neşiriniň maglumatlaryna salgylanyp, ýerli habar beriş serişdeleri habar berýär.

Hasabat döwründe Türkmenistan Azerbaýjana baran daşary ýurtly jahankeşdeleriň sany boýunça 13-nji orunda ýerleşdi. Ýylyň ilkinji ýedi aýynda Azerbaýjana daşary ýurtlardan jemi 1 million 342,6 müň syýahatçy geldi. Şolaryň takmynan 1,3 göterimini Türkmenistanyň raýatlary düzdi.

Maglumatlara görä, Azerbaýjana syýahat eden daşary ýurtlylaryň sany boýunça Russiýa, Türkiýe we Eýran öňdäki orunlary eýeleýär. Bu ýurtlardan Azerbaýjana gelýän jahankeşdeleriň sany beýleki döwletler bilen deňeşdirilende has ýokary boldy.

Türkmenistan bilen Azerbaýjanyň arasynda soňky ýyllarda ulag, ykdysadyýet, medeni-ynsanperwer we beýleki ugurlardaky gatnaşyklaryň ösdürilmegi iki ýurduň raýatlarynyň arasyndaky aragatnaşyklaryň giňelmegine hem şert döredýär.

Syýahatçylyk akymynyň ýokarlanmagy bolsa ýurtlaryň arasyndaky ynsanperwer gatnaşyklary pugtalandyrmak, medeni miras bilen tanyşmak we iki halkyň arasynda dostlukly gatnaşyklary ösdürmek babatda möhüm ähmiýete eýedir.