Hytaýyň Çendu şäherinden Türkmenistanyň Serhet şäherindäki Serahs demir ýol menziline täze göni ýük demir ýol gatnawy açyldy. Bu ugur Hytaý bilen Merkezi Aziýanyň arasynda logistika gatnaşyklaryny ösdürmekde möhüm ädimleriň biri hökmünde görkezilýär.

Sinhua habarlar gullugynyň maglumatlaryna görä, täze ugur boýunça Çendudan Türkmenistana ilkinji ýük otlusy ugradyldy. Bu gatnaw Çendu bilen Türkmenistanyň arasynda ýola goýlan ikinji göni demir ýol ýük ugruna öwrüldi.

Hytaý bilen Merkezi Aziýanyň arasynda ýük otlularynyň gatnaw ulgamy 2014-nji ýylda işe girizilenden bäri yzygiderli giňeldilýär. Ilkibaşda Çendu, Almaty we Daşkent şäherlerini birleşdiren ugurlar soňra Astanany, Bişkegi, Duşanbäni we Serahsy hem öz içine aldy.

Täze demir ýol ugrunyň açylmagy Serahsyň sebitara ýük daşamalarynda möhüm üstaşyr merkez hökmünde ornuny has-da berkitmäge mümkinçilik berýär. Şeýle hem bu ugur Hytaý bilen Türkmenistanyň arasynda haryt gatnawlarynyň göni we yzygiderli ösdürilmegine şert döredýär.

Sinhua habarlar gullugy täze logistika hyzmatynyň işe girizilmeginiň Hytaý bilen Türkmenistanyň arasyndaky gury ýer söwdasynyň gerimini giňeltýändigini belleýär.