S.A.Nyýazow adyndaky Türkmen oba hojalyk uniwersitetiniň Türkmenabat agrosenagat orta hünär okuw mekdebi 2025/2026-njy okuw ýyly üçin talyplyga kabul edýär

S.A.NYÝAZOW ADYNDAKY TÜRKMEN OBA HOJALYK UNIWERSITETINIŇ TÜRKMENABAT AGROSENAGAT ORTA HÜNÄR OKUW MEKDEBI
2025/2026-njy okuw ýyly üçin aşakdaky hünärler boýunça talyplyga kabul edýär:
1. Oba hojalygyny mehanizmleşdirmek.
2. Agronomçylyk.
3. Gidromeliorasiýa.
4. Weterinar lukmançylygy.
5. Tikin önümçiliginiň tehnologiýasy.
6. Ykdysadyýet we sanly maglumat
tehnologiýalary (oba hojalygynda).
7. Ykdysadyýet we buhgalterçilik hasaba alnyşy (oba hojalygynda).
8. Maglumat ulgamlary we programmirlemek (oba hojalygynda).
9. Ýer gurluşygy we kadastrlar.
10. Azyk önümçiliginiň tehnologiýasy.
11. Dokmaçylyk we ýeňil senagat
önümçiliginiň tehnologiýasy.
12. Iş kagyzlarynyň dolanyşygyny guramak we arhiw işi.
13. Buhgalterçilik hasaba alnyşy we audit.
Türkmenabat agrosenagat orta hünär okuw mekdebine umumy orta bilimden pes bolmadyk binýatda bilimi bolan, ýaşy 35-den geçmedik Türkmenistanyň raýatlary giriş synaglarynyň netijeleri boýunça bäsleşik esasynda kabul edilýär.
Okuwyň möhleti — 2 ýyl. Türkmenabat agrosenagat orta hünär okuw mekdebinde okuwlar tölegli esasda alnyp barylýar.
Resmi iş kagyzlary Türkmenabat şäherinde 2025-nji ýylyň 14-nji iýuly — 18-nji awgusty aralygynda kabul edilýär.
Resmi iş kagyzlarynyň sanawy:
— bellenilen nusgada direktoryň adyna ýazylan arza;
— bellenilen nusgadaky sowalnama (anketa);
— bilimi baradaky resminama (asyl nusgasy);
— Türkmenistanyň Saglygy goraýyş we derman senagaty ministrligi tarapyndan bellenilen nusgadaky saglyk kepilnamasy;
— soňky okan ýerinden (işlän ýerinden, harby bölümden) häsiýetnama;
— bellenilen nusga boýunça okuw üçin tölegi öz wagtynda amal etmegiň kepil haty;
— 3x4 sm ölçegdäki sekiz sany fotosurat;
— işleýänler üçin zähmet depderçesiniň tassyklanan göçürmesi;
— okuw dersleri boýunça mekdep okuwçylarynyň döwlet bäsleşiginiň ýeňijileri, halkara bäsleşiklere gatnaşan Türkmenistanyň ýygyndy toparynyň agzalary şol ýagdaýlary tassyklaýan degişli resminamanyň asyl nusgasyny tabşyrýarlar.
Bulardan başga-da, okuwa girmäge isleg bildirýänler ýokarda görkezilen resminamalar bilen birlikde, resminamalary kabul edýän iş toparyna aşakdakylary görkezýärler we nusgalaryny tabşyrýarlar:
— pasportyny;
— harby şahadatnamasyny ýa-da harby hasaba goýlandygy hakynda şahadatnamasyny.
Dalaşgär bäsleşiksiz we (ýa-da) okuwa kabul edilmek üçin artykmaç hukukdan peýdalanýandygyny tassyklaýan beýleki resminamalary görkezip biler.
Nädogry berlen maglumatlar we galp resmi iş kagyzlary üçin dalaşgär şahsy jogapkärçilik çekýär.
Giriş synaglary we okuwa kabul edilmek S.A.Nyýazow adyndaky Türkmen oba hojalyk uniwersitetiniň Türkmenabat agrosenagat orta hünär okuw mekdebinde (Türkmenabat ş.) 2025-nji ýylyň awgust aýynyň 21-22-si, 24-i we 25-i günlerinde geçirilýär.
Giriş synaglary aşakdaky okuw dersleri boýunça geçirilýär:
hünärler: agronomçylyk; weterinar lukmançylygy; azyk önümçiliginiň tehnologiýasy — biologiýa, himiýa,Türkmenistanyň taryhy;
hünärler: dokmaçylyk we ýeňil senagat önümçiliginiň tehnologiýasy; tikin önümçiliginiň tehnologiýasy — himiýa, fizika, Türkmenistanyň taryhy;
hünärler: ykdysadyýet we buhgalterçilik hasaba alnyşy (oba hojalygynda); buhgalterçilik hasaba alnyşy we audit — matematika, biologiýa, Türkmenistanyň taryhy;
hünärler: oba hojalygyny mehanizmleşdirmek; ykdysadyýet we sanly maglumat tehnologiýalary (oba hojalygynda); maglumat ulgamlary we programmirlemek (oba hojalygynda); ýer gurluşygy we kadastrlar; gidromeliorasiýa; iş kagyzlarynyň dolanyşygyny guramak we arhiw işi — matematika, fizika, Türkmenistanyň taryhy.
Okuw dersleri boýunça giriş synaglary Türkmenistanyň orta mekdepleriniň okuw maksatnamalarynyň esasynda, döwlet dilinde dilden geçirilýär.
Giriş synaglarynyň tertibinde bellenen wagtda synaga esassyz sebäplere görä gelip bilmedikler ýa-da dersleriň biri boýunça synagdan geçip bilmedikler soňky synaglara goýberilmeýär.
Giriş synaglaryndan üstünlikli geçen ýagdaýynda, bäsleşiksiz we talyplyga kabul edilmek üçin artykmaç hukukdan:
— soňky 2-3 ýylyň dowamynda ýokary netijeleri gazanan we etrap häkimligi tarapyndan degişli hünärlere hödürlenen kärendeçiler we mülkdarlar;
— «Bilim hakynda» Türkmenistanyň Kanunynyň rejelenen görnüşinde kesgitlenen düzgünlere laýyk gelýän dalaşgärler peýdalanýarlar.

S.A.Nyýazow adyndaky Türkmen oba
hojalyk uniwersitetiniň Türkmenabat
agrosenagat orta hünär okuw mekdebiniň
salgysy: Türkmenabat ş., Zelili köçesi, 1a,
tel.: 9-88-12, 9-89-56, 9-87-71.