Türkmenistanyň ýaş alymlary we hünärmenleri Bütindünýä Söwda Guramasynyň (BSG) Youth Talent Incubator Programme atly maksatnamasynyň ikinji tapgyryna gatnaşmak üçin dalaşgär bolup bilerler. Başlangyç halkara söwdasy, gender deňligi hem-de zenanlaryň ykdysady mümkinçiliklerini giňeltmek bilen bagly meseleleri öwrenmäge gönükdirilendir.

Maksatnama 20–35 ýaş aralygyndaky alymlar, ýokary okuw mekdepleriniň, seljeriş we ylmy-barlag merkezleriniň, şeýle hem degişli döwlet edaralarynyň işgärleri üçin niýetlenendir. Gatnaşmak isleýän hünärmenleriň söwda we gender deňligi boýunça işlemegi ýa-da bu ugurlary ylmy we hünär işlerine ornaşdyrmagy meýilleşdirmegi talap edilýär.

Türkmenistanyň dalaşgärleri üçin esasy şertleriň biri — işleýän edarasynyň resmi goldawyny almakdyr. Dalaşgär ýokary okuw mekdebi, ylmy-barlag merkezi, gazna, seljeriş guramasy ýa-da degişli beýleki edara tarapyndan resmi taýdan hödürlenmeli. Şeýle hem maksatnama gatnaşmak islegini esaslandyrýan höweslendiriş hatyny taýýarlamak zerurdyr.

Maksatnamanyň ikinji tapgyry 2026-njy ýylyň 12-nji oktýabryndan 2027-nji ýylyň 30-njy iýunyna çenli doly onlaýn görnüşde geçiriler. Gatnaşmak mugt bolup, saýlanan ýaş hünärmenlere halypalyk goldawy, ýörite okuwlar we amaly işler teklip ediler.

Gatnaşyjylar halkara bilermenleri, şeýle hem BSG-ä agza döwletleriň wekilleri bilen tejribe alyşmaga we hünär aragatnaşyklaryny ösdürmäge mümkinçilik alarlar. Maksatnama jemi 35-e çenli gatnaşyjynyň saýlanylmagy meýilleşdirilýär.

Dalaşgärlik resminamalary 2026-njy ýylyň 24-nji sentýabrynda Merkezi Ýewropa wagty bilen sagat 23:59-a çenli tabşyrylmalydyr. Saýlawyň netijeleriniň 1-nji oktýabrda dalaşgärlere elektron poçta arkaly ýetirilmegine garaşylýar.

Maksatnamanyň şertleri, dalaşgärlere bildirilýän talaplar we resminamalary tabşyrmagyň tertibi barada giňişleýin maglumat Bütindünýä Söwda Guramasynyň resmi internet çeşmelerinde ýerleşdirildi.