2025-yil yakunlari bo‘yicha ijtimoiy, iqtisodiy va madaniy barcha ko‘rsatkichlar borasida eng yuqori natijalarga erishgan Toshog‘uz viloyatining Ko‘hnaurganch tumani barcha aholisiga

Hurmatli odamlar! Sizlarni Berqarar davlatning yangi davri Uyg‘onishi davrining Xalqaro tinchlik va ishonch yili yakunlari bo‘yicha ijtimoiy, iqtisodiy va madaniy barcha ko‘rsatkichlar borasida Toshog‘uz viloyatining Ko‘hnaurganch tumani eng yuqori natijalarga erishib, tanlovda g‘olib deb e’lon qilingani hamda tuman hokimligining 1 million Amerika dollari miqdoridagi pul mukofoti bilan taqdirlangani munosabati bilan chin qalbimdan tabriklayman.

Biz 2025-yilda barcha taraqqiyotimiz hamda yutuqlarimiz asosi bo‘lgan Mustaqilligimiz va Betarafligimiz poydevorini yanada mustahkamlab, obod, baxtiyor hayotimiz yo‘lida oldimizga qo‘ygan maqsadlarimizni muvaffaqiyatli amalga oshirib, ulkan ilgari siljishlarga erishdik. Har bir kuni milliy va xalqaro ahamiyatga molik voqealar bilan shonlangan o‘tgan yilda yangi qishloq va shaharlarimiz qurilishini jadal davom ettirdik, yirik sanoat, energetika, transport-kommunikatsiya infratuzilmalarini yaratdik. «Vatan faqat xalqi bilan Vatandir! Davlat faqat xalqi bilan davlatdir!» degan insonparvar tamoyilimizning muvaffaqiyatli amalga oshirilishi asosida yurtimiz obodlik, boqiy baxtiyorlik va ulkan rivojlanish makoniga aylandi.

Aziz vatandoshlar! Toshog‘uz viloyatining Ko‘hnaurganch tumani ham ijtimoiy, iqtisodiy va madaniy jihatdan yurtimizning jadal rivojlanayotgan tumanlaridan biridir. Tumanning iqtisodiyoti, qishloq xo‘jaligi, qurilish, madaniyat, ta’lim, sog‘liqni saqlash tizimlari shiddat bilan rivojlantirilmoqda. Bu yerda zamonaviy maktablar, bog‘chalar, sport majmualari, turar joy binolari qurildi va bu yo‘nalishdagi ishlarning sur’ati yanada kuchaytirilmoqda. Diyorimizning sanoat-ishlab chiqarish tarmog‘ini yuksaltirish borasida amalga oshirilayotgan davlat siyosati natijasida, barcha hududlar bilan bir qatorda, bu tumanda ham innovatsion texnologiyali, quvvatli sanoat, ishlab chiqarish ob’ektlari ishga tushirilmoqda hamda yangi ish o‘rinlari yaratilmoqda. Tuman mehnatkashlarining bug‘doy, paxta, meva, sabzavot va poliz mahsulotlarining mo‘l hosilini yetishtirish, chorva mollarining bosh sonini ko‘paytirish yo‘lidagi yutuqlari quvonarlidir.

Buyuk Ipak yo‘li chorrahasida joylashgan qadimiy Ko‘hnaurganchning boy tarixi, dunyo miqyosida tan olingan arxeologik va me’moriy yodgorliklari bor. YUNESKOning Butunjahon merosi ro‘yxatiga kiritilgan Ko‘hnaurganch shahrining me’morchilik san’ati, Qutlug‘ Temur minorasi, To‘rabek xonim maqbarasi, El Arslon, Najmiddin Kubro, Tekesh, Sulton Ali, Piryor vali maqbaralari, qimmatli arxeologik topilmalar, tarixiy manbalar, ilmiy ishlar qadimiy Ko‘hnaurganchning o‘z davrida boy o‘lka bo‘lganidan dalolat beradi.

Toshog‘uz viloyatining bu hududida chetdan keltiriladigan mahsulotlar o‘rnini bosuvchi yuqori sifatli, ekologik toza, raqobatbardosh tovarlarni ishlab chiqarishda, aholiga ko‘rsatilayotgan xizmatlar sifatini oshirishda ulkan ishlar olib borilmoqda. Xalqaro tinchlik va ishonch yilida, Mustaqilligimizning 34 yillik bayrami arafasida bu tumanda Bitaraplyk shaharchasining va avtomobil ko‘priklarining ochilib foydalanishga topshirilishi ijtimoiy-iqtisodiy islohotlarimiz muvaffaqiyatli amalga oshirilayotganining yana bir yorqin misoliga aylandi. Zamonaviy shaharcha hududida barcha qulayliklarga ega bo‘lgan 400 ta turar joy binosi, 160 o‘rinli bog‘cha, 420 o‘rinli o‘rta maktab, 200 o‘rinli madaniyat uyi, 500 o‘rinli to‘yxona, salomatlik uyi, savdo markazi, xizmat ko‘rsatish uyi, aloqa bo‘limi va boshqa madaniy-maishiy, ishlab chiqarish maqsadli ob’ektlar barpo etildi. Bitaraplyk shaharchasi Mustaqil, boqiy Betaraf Turkmanistonning shiddatli taraqqiyotining o‘ziga xos ifodasidir.

Aziz vatandoshlar! Bizning asosiy maqsadimiz aziz Vatanimizda amalga oshirilayotgan yuksak maqsadli ishlarni xalqimizning obod hamda baxtiyor hayoti yo‘lida yo‘naltirib, yorug‘ kelajak poydevorini mustahkamlashdan iboratdir. Ko‘hnaurganch tumani mehnatkashlarining kelajakda ham barcha g‘ayrat va intilishlarini Mustaqil, doimiy Betaraf davlatimizni bundan buyon ham gullatib yashnatishga yo‘naltirishlariga qat’iy ishonaman. Turkman xalqining Milliy Lideri, Turkmaniston Xalq Maslahati Raisi Qahramon Arkadagimizning: «Vatanga bo‘lgan sevgi inson uchun eng buyuk sevgidir. Muqaddas sevgidir. Vatanga bo‘lgan sevgi insonning butun umrini bezaydi. Inson uchun Vatandan buyuk muqaddaslik, Vatandan buyuk qadriyat yo‘qdir. Baxtli bo‘lish uchun Vatanni sevmoq kerak. Odobning yaxshisi ham Vatanni sevmoqdir» degan so‘zlariga amal qilib, Vatanimizga bo‘lgan buyuk sevgimiz bilan bundan buyon ham ulkan yutuqlarni qo‘lga kiritish barchamizning muqaddas burchimizdir.

Hurmatli odamlar! Toshog‘uz viloyatining Ko‘hnaurganch tumani barcha aholisini bugungi quvonchli voqea bilan yana bir bor chin qalbimdan tabriklayman. Sizlarga mustahkam sog‘liq, uzoq umr, osoyishta va obod hayot, tuganmas baxt, aziz Vatanimizning bundan buyon ham gullab-yashnashi yo‘lida olib borayotgan ishlaringizda yangi zafarlar tilayman.

Turkmaniston Prezidenti Serdar BERDIMUHAMEDOV.