Turkmaniston xalq artisti Annaberdi Orazmämmedow Shri-Lanka poytaxti Kolombo shahrida bo‘lib o‘tgan «ABU TV Song Festival 2026» xalqaro musiqa festivalida mukofot bilan taqdirlandi. Turkmanistonlik xonanda xalqaro sahnada «Arkadagly Serdarym» qo‘shig‘ini ijro etib, milliy musiqa san’atini namoyish qildi.

Mazkur festival Osiyo-Tinch okeani radioeshittirishlar ittifoqining (ABU) 63-Bosh assambleyasi doirasida tashkil etildi. Shri-Lankada o‘tkazilgan xalqaro tadbirlarda Turkmaniston delegatsiyasi ham faol ishtirok etdi.

Dunyoning 66 mamlakatidan 225 ta media tashkilotining 350 nafardan ortiq vakilini birlashtirgan Bosh assambleya dasturidan turli uchrashuvlar, majlislar va madaniy tadbirlar o‘rin oldi. Ular qatorida Kolombo shahridagi «Stein Studios» markazida tashkil etilgan «ABU TV Song Festival 2026» xalqaro musiqa festivali ham bo‘lib o‘tdi.

ABUning xalqaro madaniy loyihalaridan biri hisoblangan ushbu festival turli mamlakatlarning musiqa san’ati, milliy madaniyati va ijodiy salohiyatini jahon jamoatchiligiga tanishtirishga qaratilgan. Bu yilgi musiqa bayrami 15-marta tashkil etildi.

Festivalda Turkmaniston nomidan qatnashgan Annaberdi Orazmämmedow «Arkadagly Serdarym» qo‘shig‘ini jo‘shqin ijro etdi. Uning chiqishi orqali xorijiy tomoshabinlar turkman milliy estrada san’atining zamonaviy xususiyatlari bilan tanishish imkoniga ega bo‘ldilar.

Tadbir yakunida turkmanistonlik xonandaga festivalning rasmiy ramzi tasvirlangan mukofot va tegishli diplom topshirildi. Ushbu e’tirof Annaberdi Orazmämmedow ijodining xalqaro miqyosda tan olingani hamda turkman musiqa san’atining dunyo bo‘ylab targ‘ib etilayotganining navbatdagi dalili bo‘ldi.