2026: Turkmanistonda yirik suv xo‘jaligi loyihalari amalga oshiriladi

Suv xo‘jaligi va melioratsiya sohasidagi yirik loyihalar 2026-yilda Turkmaniston qishloq xo‘jaligi tarmog‘ini rivojlantirishning asosiy yo‘nalishlaridan biriga aylanadi. Bu haqda seshanba kuni chop etilgan “Neytralniy Turkmenistan” gazetasida xabar berildi.

Ustuvor yo‘nalishlar qatoriga “Oltin asr” turkman ko‘li, zovur-drenaj suv tizimlari qurilishi, sig‘imi 90 million kubometr bo‘lgan suv omborini barpo etish, shuningdek, mamlakatning barcha viloyatlarida sug‘orish tizimlarini zamonaviylashtirish kiradi.

Shuningdek, qishloq xo‘jaligi sohasida Toshovuz viloyatida suv o‘tkazmaydigan qoplamalar yotqizish, Shasenem kollektorini rekonstruksiya qilish hamda Qoraqum daryosining suv o‘tkazish qobiliyatini oshirish bo‘yicha ishlar rejalashtirilmoqda.

Ushbu loyihalarning amalga oshirilishi sug‘oriladigan yerlarning meliorativ holatini yaxshilash va qishloq xo‘jaligi yerlarini majmuaviy qayta tiklashga qaratilgan.

“Turkmanistonni 2026-yilda ijtimoiy-iqtisodiy rivojlantirish va investitsiya dasturi”da zamonaviy va suv tejovchi texnologiyalarni joriy etish orqali qishloq xo‘jaligi ekinlari hosildorligini oshirish ko‘zda tutilgan. Shuningdek, chorvachilikni rivojlantirish, yirik va mayda shoxli mollar hamda parrandalar bosh sonini ko‘paytirish, shuningdek, qishloq xo‘jaligida sun’iy intellekt texnologiyalaridan foydalanish masalalariga alohida e’tibor qaratilmoqda.

Xabarda ta’kidlanganidek, 2026-yilda agrosanoat majmuasi oziq-ovqat xavfsizligini ta’minlash bo‘yicha strategik vazifalarni bajarishda davom etadi. Davlat dasturi doirasida qishloq xo‘jaligi mahsulotlarini yetishtirish, ekologik toza yechimlarni joriy etish va yerlarning meliorativ holatini bosqichma-bosqich yaxshilashga alohida ahamiyat beriladi.