AQSH, Meksika va Kanada jahon chempionati arafasida Ebolaning tarqalishiga qarshi muvofiqlashtirilgan choralarni joriy etdi
AQSH, Meksika va Kanada Ebolaning eng yuqori yuqish xavfi boʻlgan Afrika mintaqalaridan kelayotgan shaxslar uchun jamoat salomatligini muhofaza qilish boʻyicha kelishilgan choralarni eʼlon qildi. Kanada Tashqi ishlar vazirligining qoʻshma bayonotida taʼkidlanganidek, ushbu muvofiqlashtirilgan choralar mamlakat fuqarolarini, shuningdek, yaqinda tashkil etiladigan futbol boʻyicha FIFA — 2026 jahon chempionatiga keladigan millionlab muxlislar, sportchilar va turistlarni himoya qilishga qaratilgan.
Shimoliy Amerikaning ushbu uchta davlati joriy etilgan choralar transchegaraviy sayohat va savdo aloqalariga toʻsqinlik qilmasligini alohida taʼkidladi.
Mamlakatlar boʻyicha joriy etilgan choralar va cheklovlar:
- Kanada: Kongo Demokratik Respublikasi, Uganda va Janubiy Sudan aholisining mamlakatga kirishini 90 kunlik muddatga taqiqladi. Ushbu chora chorshanba kuni kuchga kirdi va bu mamlakatlardan kelayotgan fuqarolar uchun 21 kunlik karantin muddati belgilandi.
- Meksika: Mamlakatning eng yirik aviakompaniyasi boʻlgan “Aeromexico”, soʻnggi 21 kun ichida Uganda, Kongo Demokratik Respublikasi va Janubiy Sudanga sayohat qilgan fuqarolarga havo yoʻli orqali Meksikaga kirish taqiqlanganini maʼlum qildi.
- Meksikaning boshqa aviatashuvchilari: Mamlakatning “Viva Aerobus” va “Volaris” kabi arzon narxli (loukoster) aviakompaniyalari ham 60 kun davomida shunga oʻxshash cheklovlarni joriy etdilar.
Eslatib oʻtamiz, AQSH, Meksika va Kanada hamkorligida tashkil etilayotgan futbol boʻyicha FIFA jahon chempionati shu yilning 11-iyunida start oladi.
