Armaniston elchisi: Turkmanistonda arman cherkovi binosi saqlanib qolgan

Turkmanboshi shahrida saqlanib qolgan arman cherkovi binosi Turkmanistonning diniy va madaniy xilma-xillikka bo‘lgan ehtiyotkorona munosabatining isbotidir. Bu haqda Armanistonning Turkmanistondagi elchisi Arsen Avagyan "News Central Asia" agentligiga bergan intervyusida aytib o‘tdi.

"Turkmanistonning Turkmanboshi shahrida arman cherkovi binosi saqlanib qolgan — bu muhim ma’naviy va madaniy markaz bo‘lib, arman jamiyatining ko‘p yillik tarixining hamda davlatning diniy va madaniy xilma-xillikka bo‘lgan hurmatli yondashuvining jonli dalilidir", — deb ta’kidladi diplomat.

Avagyanning so‘zlariga ko‘ra, ikki davlat o‘rtasidagi munosabatlar nafaqat siyosiy va iqtisodiy, balki chuqur tarixiy-madaniy xarakterga ham ega. Xususan, Armanistonning Argavand qishlog‘ida turkman amirlari maqbarasi joylashgan. Ushbu yodgorlik mintaqaning ko‘p qatlamli umumiy tarixini aks ettiradi.

"Ushbu yodgorlikning saqlab qolinishi va Armanistonning tarixiy-madaniy landshaftining bir qismi bo‘lishi bizning turkman xalqi merosiga bo‘lgan hurmatimiz belgisidir", — dedi elchi.

Shuningdek, Avagyan Yerevan — Ashxobod yo‘nalishi bo‘yicha to‘g‘ridan-to‘g‘ri aviaqatnovlarning ochilishiga umid bildirdi va buni ishbilarmonlik, sayyohlik hamda madaniy aloqalarni mustahkamlash uchun muhim qadam deb atadi.

Armaniston elchixonasi ma’lumotlariga ko‘ra, Turkmanistondagi arman jamoasi XIX asr oxirida — O‘rta Osiyo temir yo‘li qurilishi davrida shakllangan. Armanistondan va Kavkazortining armanlar yashaydigan hududlaridan kelgan hunarmandlar, duradgorlar va temirchilar Krasnovodsk (hozirgi Turkmanboshi) — Toshkent yo‘nalishidagi ko‘priklar qurilishida qatnashganlar hamda mintaqaning yirik shaharlari: Ashxobod, Mari, Krasnovodsk, Chorjo‘y (hozirgi Turkmanobod) va Qizilarvotda qo‘nim topganlar.

Turkmanboshidagi cherkov hozirgi vaqtda faoliyat ko‘rsatmayapti va kapital ta’mirlashga muhtoj.