Ashxobodda Turkmaniston diplomatik xodimlari kuniga bag‘ishlangan konferensiya bo‘lib o‘tdi

Kecha Turkmaniston Tashqi ishlar vazirligining Xalqaro munosabatlar institutida Turkmaniston diplomatik xodimlari kuni munosabati bilan «Mustaqil, doimiy Betaraf Turkmaniston – tulpor shiddatli orzular makoni» yilida Turkmaniston tashqi siyosatining ustuvor yo‘nalishlari» mavzusida xalqaro konferensiya bo‘lib o‘tdi. Bu haqda Turkmaniston Tashqi ishlar vazirligi xabar bermoqda.

Konferensiya doirasida institut foyyesida kasb bayramiga bag‘ishlangan hamda Turkmanistonda e’lon qilingan 2026-yil shiori bilan uyg‘unlashgan ko‘rgazma tashkil etildi. Tadbirda Turkmaniston diplomatik xizmati rahbarlari, xodimlari va faxriylari, mamlakatda akkreditatsiyadan o‘tgan diplomatik vakolatxonalar va xalqaro tashkilotlar vakolatxonalari rahbarlari va vakillari, mamlakat oliy o‘quv yurtlari professor-o‘qituvchilari va talabalari, shuningdek, jamoat tashkilotlari va ommaviy axborot vositalari vakillari ishtirok etdilar.

Konferensiya davomida Turkmaniston Vazirlar Mahkamasi Raisining o‘rinbosari, Tashqi ishlar vaziri Rashid Meredov, BMT Bosh kotibining Maxsus vakili, BMTning Markaziy Osiyo uchun preventiv diplomatiya bo‘yicha mintaqaviy markazi rahbari Kaxa Imnadze, BMTning Turkmanistondagi Doimiy muvofiqlashtiruvchisi Dmitro Shlapachenko, Armaniston Respublikasining Turkmanistondagi Favqulodda va Muxtor Elchisi Arsen Avagyan, Buyuk Britaniya va Shimoliy Irlandiya Birlashgan Qirolligining Turkmanistondagi Favqulodda va Muxtor Elchisi Stiven Konlon hamda Yevropa tiklanish va taraqqiyot bankining Turkmanistondagi vakolatxonasi rahbari Erik Livni so‘zga chiqdilar.

Turkmaniston Tashqi ishlar vaziri Rashid Meredov o‘z nutqida doimiy betaraflik tamoyillariga asoslangan tashqi siyosat xalqaro hamkorlikning barqaror va adolatli tizimini shakllantirishga qaratilganini ta’kidladi. Shuningdek, Turkmaniston energetika va transport bog‘liqligi, ekologik diplomatiya hamda xalqaro huquqni mustahkamlash yo‘nalishlarida Birlashgan Millatlar Tashkilotining markaziy o‘rnini qo‘llab-quvvatlash orqali faol ishtirok etayotgani qayd etildi.

Konferensiya ishtirokchilari globallashuv sharoitida turkman diplomatiyasining ortib borayotgan o‘rni, uning tinchlik, ishonch va o‘zaro manfaatli hamkorlikni mustahkamlashga qo‘shayotgan hissasini e’tirof etdilar. Davlat rahbarining qo‘llab-quvvatlashi natijasida diplomatik xizmatning moddiy-texnika bazasi izchil takomillashtirilayotgani, uning infratuzilmasi modernizatsiya qilinayotgani hamda kadrlar salohiyati mustahkamlanayotgani ta’kidlandi.

Konferensiya yakunida ishtirokchilar tomonidan Turkmaniston Prezidenti nomiga Murojaatnoma qabul qilindi.

Shonli sana munosabati bilan Turkmaniston tashqi siyosiy strategiyasini amalga oshirishda faol ishtirok etayotganliklari uchun diplomatik xizmatning yosh xodimlariga hamda Xalqaro munosabatlar institutining bitiruvchi kurs talabalariga Turkmaniston Tashqi ishlar vazirligining diplomlari tantanali ravishda topshirildi.