Berdimuhammedov Aliyevga akhaltekin otini, Mirziyoyevga esa tuya va tuya chaqasini sovg‘a qildi

TDH xabarida sovg‘alar "yuqori darajadagi uchrashuvda ishtirok etgani, konstruktiv qarorlarni qo‘llab-quvvatlagani va muzokaralar natijasida erishilgan kelishuvlar uchun chuqur minnatdorchilik belgisi sifatida berilgan"ligi ta’kidlangan. Bu sovg‘alar uch davlat yetakchilari o‘rtasidagi do‘stlik va o‘zaro hurmat ramzi bo‘ldi.

Sammit konstruktiv muloqot va o‘zaro tushunish muhitida o‘tdi. Uchrashuv davomida prezidentlar iqtisodiyot, transport, energetika, gumanitar aloqalar va boshqa sohalarda uch tomonlama hamkorlikni yanada rivojlantirish masalalarini muhokama qildilar.

Bundan tashqari, sammit yakunida strategik sheriklikni chuqurlashtirish va mintaqada barqarorlik hamda farovonlikni ta’minlash uchun kuchlarni muvofiqlashtirishning ahamiyati haqida yetakchilar birgalikda bayonot qabul qildilar.

Tadbir davomida transport-logistika va fuqarolik aviatsiyasi sohasida hamkorlik bo‘yicha memorandumlar, xalqaro yo‘laklarni rivojlantirish, infratuzilmani yaxshilash hamda uch mamlakat o‘rtasidagi transport va savdo aloqalarini soddalashtirishga qaratilgan hujjatlar imzolandi. Bundan tashqari, sanoat, energetika va madaniy sohalarda hamkorlikni kengaytirishga qaratilgan qo‘shimcha kelishuvlar ham imzolandi.

Ushbu uchrashuv Turkmaniston, Ozarbayjon va O‘zbekiston o‘rtasida o‘zaro manfaatli hamkorlikni rivojlantirish, mintaqada tinchlik va barqarorlikni mustahkamlashga qaratilgan yangi sheriklik formatini yaratishda muhim qadam bo‘ldi.