Turkmanistonning BMT huzuridagi doimiy vakili, Favqulodda va Muxtor Elchi Vepa Hajiyev BMT Xavfsizlik Kengashining «Xalqaro tinchlik va xavfsizlikni taʼminlash: tinchlik, xavfsizlik va farovonlik poydevori sifatida tabiiy resurslarni boshqarish» nomli yuqori darajadagi ochiq muhokamalarida nutq soʻzladi. Bu haqda tashqi siyosat idorasi xabar bermoqda. 22-iyul kuni boʻlib oʻtgan yigʻilishda doimiy vakil Turkmaniston tabiiy resurslarni masʼuliyatli, adolatli va oʻzaro manfaatli asosda boshqarish tarafdori ekanini, ularni tinchlik va barqaror rivojlanishni taʼminlashning muhim sharti sifatida koʻrishini taʼkidladi. Nutqda Turkmanistonning oldini olish diplomatiyasi mexanizmlarini mustahkamlashga, tinchlik va ishonch falsafasini ilgari surishga, energetika hamda transport aloqalarini rivojlantirishga, suv xavfsizligini taʼminlashga qaratilgan xalqaro tashabbuslariga alohida eʼtibor qaratildi. Shuningdek, ushbu yoʻnalishlar Turkmaniston tashabbusi bilan qabul qilingan BMT Bosh Assambleyasining 32 ta rezolyutsiyasida oʻz aksini topgani qayd etildi. Shu bilan birga, yigʻilishda soʻnggi oʻtkazilgan Turkmaniston Xalq Maslahati Prezidiumi yigʻilishi mamlakatning xalqaro tinchlik, xavfsizlik va barqaror rivojlanishni mustahkamlashga qaratilgan siyosatiga sodiqligini yana bir bor tasdiqlagani taʼkidlandi. Nutq yakunida Turkmanistonning 2031–2032-yillar uchun BMT Xavfsizlik Kengashining doimiy boʻlmagan aʼzoligiga nomzodligi munosabati bilan mamlakat oldini olish diplomatiyasini ilgari surish, ishonchni mustahkamlash, tabiiy resurslarni masʼuliyatli boshqarish va xalqaro hamkorlikni rivojlantirish orqali BMT faoliyatiga oʻzining munosib hissasini qoʻshishga tayyorligi tasdiqlandi.