EKO mintaqasida “Avaza” Harakatlar dasturini amalga oshirish bo‘yicha muhim qadamlar

2026 yil 27 yanvar kuni Tehron shahrida Iqtisodiy hamkorlik tashkiloti (EKO) Doimiy vakillar kengashining navbatdagi yig‘ilishi bo‘lib o‘tdi. Bu haqda Turkmaniston Tashqi ishlar vazirligining rasmiy veb-saytida xabar berildi.

Yig‘ilish davomida “2024–2034 yillarga mo‘ljallangan Avaza Harakatlar dasturi”da belgilangan chora-tadbirlarni amalga oshirish masalalari muhokama qilindi.

Xususan, mazkur Dastur doirasidagi uchinchi ustuvor yo‘nalish — “Tranzit, transport va o‘zaro bog‘liqlik”ni EKO mintaqasida amalga oshirish bo‘yicha taklif ilgari surildi. Ushbu taklif va uni amalga oshirish yuzasidan uchrashuvlar o‘tkazish tashabbusi Kengash tomonidan qo‘llab-quvvatlandi.

Turkmanistonning EKO huzuridagi Doimiy vakili, elchi Y. Gayipov mazkur tashabbusni qo‘llab-quvvatlagani uchun EKO Kotibiyatiga va a’zo davlatlar vakillariga minnatdorlik bildirib, tomonlar uning amalga oshirilishida faol ishtirok etishiga ishonch bildirdi.

Shuningdek, BMTning dengizga chiqish imkoniyati bo‘lmagan rivojlanayotgan davlatlar bo‘yicha uchinchi konferensiyasi doirasida “Avaza Harakatlar dasturi 2024–2034 va EKO mintaqasi” mavzusida tashkilot tomonidan amalga oshirilgan ishlar va kelgusidagi rejalashtirilgan harakatlar taqdim etildi.

Avvalroq, Turkmaniston tomoni tashabbusi bilan Avaza Harakatlar dasturining “Tranzit, transport va o‘zaro bog‘liqlik” deb nomlangan uchinchi ustuvor yo‘nalishi kelgusida qabul qilinishi rejalashtirilgan “Iqtisodiy hamkorlikning strategik maqsadlari – 2035” hujjati loyihasiga kiritilgan edi.

Bundan tashqari, Iqtisodiy hamkorlik tashkilotining rasmiy veb-saytida “AWAZA Programme of Action 2024–2034 and the ECO Region” nomli maxsus bo‘lim ochildi.