Instagramda «katta tozalash»: Ronaldu va boshqa yulduzlar millionlab kuzatuvchilarini yo‘qotdi
Instagram ijtimoiy tarmog‘i 6-maydan boshlab platformani botlar, spam va faol bo‘lmagan soxta akkauntlardan tozalash bo‘yicha keng ko‘lamli ishlarni boshladi. Ushbu chora dunyoning eng mashhur yulduzlarining obunachilari soniga sezilarli darajada ta’sir ko‘rsatdi.
Tozalash ishlari natijasida dunyoga mashhur shaxslar millionlab kuzatuvchilaridan mahrum bo‘ldilar:
- Kayli Jenner: 15 million;
- Krishtianu Ronaldu: 8 million;
- Ariana Grande va Selena Gomes: har biri 6 milliondan;
- Jastin Biber: 5 million obunachisini yo‘qotdi.
8 million kuzatuvchisini yo‘qotganiga qaramay, mashhur futbolchi Krishtianu Ronaldu umumiy 666 million obunachisi bilan Instagram platformasida dunyo bo‘yicha birinchi o‘rindagi mavqeini saqlab qoldi. Bu ko‘rsatkich uning hanuzgacha eng ko‘p kuzatuvchisi bo‘lgan shaxs ekanligini tasdiqlaydi.
Instagram vakillari ushbu choraning asosiy maqsadi platformadagi haqiqiy bo‘lmagan va soxta faollikni bartaraf etish ekanligini ta’kidlamoqda. Shu sababli, oddiy foydalanuvchilarning ham kuzatuvchilari soni bir necha kishiga kamayishi mumkin. Mutaxassislar bu haqiqiy odamlarning kuzatishni to‘xtatishi emas, balki avtomatik tizim tomonidan o‘chirilgan «harakatsiz» akkauntlar ekanligini aytib, xavotirga o‘rin yo‘qligini bildirmoqdalar.
