Kaspiy qirg‘og‘idan chegaragacha: Strategik yo‘l qurilishi yangi sur’at kasb etdi
Turkmanistonning xalqaro tranzit-transport imkoniyatlarini kengaytirishda strategik ahamiyatga ega bo‘lgan “Turkmanboshi–Garabo‘g‘oz–Qozog‘iston chegarasi” avtomobil yo‘li qurilishi qizg‘in davom etmoqda. Loyihani amalga oshirish mintaqadagi savdo aylanishini yangi bosqichga ko‘tarish va logistika hamkorligini mustahkamlashga qaratilgan.
Hozirgi vaqtda zamonaviy avtomobil yo‘li qurilishi ikki asosiy qismda olib borilmoqda:
- Turkmanboshi–Garabo‘g‘oz qismi: uzunligi 207 kilometr.
- Garabo‘g‘oz–Qozog‘iston chegarasi qismi: uzunligi 43,6 kilometr.
Qurilish ishlari Turkmaniston Avtomobil yo‘llari vazirligi buyurtmasi asosida “Altyn Nesil” xo‘jalik jamiyati tomonidan amalga oshirilmoqda. Ish maydonlarida 1000 dan ortiq texnika va 1300 dan ortiq mutaxassis kecha-yu kunduz mehnat qilmoqda.
Loyiha doirasida yo‘l bilan birga suv tozalash inshootlari, zamonaviy avtoturargohlar va yo‘l harakati xavfsizligi punktlari ham barpo etilmoqda. Qozog‘iston chegarasigacha bo‘lgan 43,6 kilometrlik qismni shu yilning iyul oyi oxirida yakunlash rejalashtirilgan.
