“KELAJAK KASBLARI ATLASI” NASHR ETILDI

Hozirgi davrda dunyo mamlakatlarida kasb-hunar ta’limini zamonaviy darajada rivojlantirishga katta ahamiyat berilmoqda. Bu mamlakatning ijtimoiy-iqtisodiy rivojlanishiga o‘zining ijobiy ta’sirini ko‘rsatadi, shuningdek, ishchi kuchini qayta tiklash manbai bo‘lib xizmat qiladi. Shu munosabat bilan, yurtimizda ta’lim tizimini innovatsion asosda rivojlantirish strategik ahamiyatga ega masalalardan biri bo‘lib, raqamli ma’lumotlarga tayanadigan iqtisodiyot shakllanayotgan hozirgi sharoitda ta’lim xizmatlarining yangi turlarini taklif etish, birinchi navbatda, iqtisodiy tarmoqlarning ishchi kuchi sifatiga nisbatan tobora ortib borayotgan talab va ehtiyojlarini qondirishga imkon beradi.

Yurtimizning hozirgi taraqqiyoti iqtisodiyotning raqamlashtirilishi bilan xarakterlanadi. Raqamli islohotlar mehnat bozoridagi munosabatlarning nafaqat mazmuniga, balki sifatiga ham o‘zining ijobiy ta’sirini ko‘rsatmoqda. Mehnat bozorini ushbu islohotlarga moslashtirish hozirgi davrning dolzarb masalasi hisoblanadi. Mehnat bozorini zamonaviy raqamli islohotlarga moslashtirish ishini muvaffaqiyatli amalga oshirish uchun davlatning raqamli davr taraqqiyoti bilan hamnafas bo‘lishiga qaratilgan samarali choralarini ishlab chiqish muhim ahamiyat kasb etadi. XXI asrda zarur bo‘lgan ko‘nikmalar va ilmiy-texnik taraqqiyotda yuz berayotgan o‘zgarishlarga tezkor javob berish qobiliyati ishchi kuchining raqobatbardosh ustunligini belgilaydi.

Yaqinda Turkmaniston Bilim vazirligi tomonidan tayyorlangan “Kelajak kasblari atlasi” deb nomlangan qo‘llanma Turkman davlat nashriyot xizmati tomonidan chop etildi. Ushbu atlas, hurmatli Prezidentimizning 2025-yil 17-oktabrdagi 1570-sonli Qarori bilan tasdiqlangan “Turkmanistonda oliy kasb-hunar ta’limini rivojlantirishning 2026 – 2052-yillar uchun Strategiyasi”ga muvofiq, oliy ma’lumotli mutaxassislarni tayyorlash uchun qisqa va o‘rta muddat davomida keng imkoniyatlarga ega bo‘ladigan tarmoq va kasblarning yo‘l ko‘rsatkichi bo‘lib, kelajakda qaysi kasblar, tarmoqlar faol shakllanishini, ularda qanday yangi texnologiyalar, mahsulotlar, boshqaruv usullari paydo bo‘lishini hamda mehnat bozorida qaysi kasblarga ehtiyoj tug‘ilishini tushunishga yordam beradi.