Inson uchun sog‘lom ko‘rish qobiliyati kundalik hayotning muhim qismidir. Ko‘zlarning sog‘lomligi o‘qishda, ishlashda, atro-muhitga to‘g‘ri yo‘nalish olishda va dunyoni to‘liq qabul qilishda katta ahamiyatga ega. Shuning uchun ko‘z kasalliklarining oldini olish va ilk alomatlar yuzaga chiqqanda vaqtida shifokorga murojaat qilish muhimdir. Lebap viloyat ko‘p tarmoqli kasalxonasining 1-oftalmologiya bo‘limi shifokori Leyli Jorayevaning ta’kidlashicha, yaqindan ko‘rmaslik, ya’ni miopiya, keng tarqalgan ko‘z kasalliklaridan biridir. Bu kasallik, asosan, maktabgacha va maktab yoshidagi bolalar orasida ko‘p uchraydi. Miopiyaning asosiy alomatlaridan biri uzoq masofada joylashgan narsalarning aniq ko‘rinmasligidir. Yaqindan ko‘rmaslikdan aziyat chekadigan odam uzoqdagi narsalarni yaxshiroq ko‘rish uchun ko‘zini qisishga moyil bo‘ladi. «Miopiya» so‘zining kelib chiqishi ham grek tilidagi «qisish» ma’nosini beruvchi so‘z bilan bog‘langandir. Miopiya vaqtida ko‘zga tushadigan yorug‘lik nurlari ko‘zning to‘r pardasida emas, balki uning oldida to‘planadi. Natijada, tashqi narsalarning obrazi aniq hosil bo‘lmaydi va ko‘rish qobiliyati pasayadi. Shifokorning tushuntirishicha, ko‘rishi normal odamlarda ko‘z olmasining uzunligi, odatda, 23–24 millimetr atrofida bo‘ladi. Miopiya holatida esa ko‘z olmasi uzayib, uning o‘lchami 26–30 millimetrga, ba’zi hollarda esa undan ham yuqori darajaga yetishi mumkin. Yaqindan ko‘rmaslikning yengil, o‘rta va yuqori darajalari bo‘ladi. Kasallik darajasini aniqlash va ko‘rish qobiliyatining bundan buyon pasayishining oldini olish uchun oftalmolog shifokorning ko‘rigidan muntazam o‘tish alohida muhimdir. Asosan-da bolalarning ko‘rish qobiliyatiga hushyor bo‘lish zarurdir. Uzoqdagi yozuvlarni ajratib ko‘rmaslik, televizorga yoki boshqa ekranlarga o‘ta yaqindan qarash, kitob o‘qiganda ko‘zlarni qisish kabi alomatlar yuzaga kelsa, mutaxassisning maslahatini olish kerak. Ko‘zlarning sog‘lomligini saqlash uchun ko‘rishga tushadigan ortiqcha og‘irlikni kamaytirish, to‘g‘ri yoritishda kitob o‘qish va ekran qurilmalaridan foydalanganda tanaffus qilish foydalidir. Ko‘z salomatligi bilan bog‘liq har qanday o‘zgarishga vaqtida e’tibor berish esa ko‘rish qobiliyatini uzoq yillar davomida saqlab qolishga yordam beradi.