Mukammal ta’lim va innovatsion texnologiyalar bo‘yicha o‘quv-metodik seminar

Mamlakatimizning ta’lim tizimini yanada rivojlantirish, yosh avlodni ajdodlarimizdan meros qolgan muqaddas an’analarga asoslanib vatanparvarlik ruhida tarbiyalash va yoshlarni jahon standartlariga muvofiq ta’lim bilan ta’minlash maqsadida keng ko‘lamli chora-tadbirlar, jumladan o‘quv-metodik seminarlar muntazam o‘tkaziladi.

Yaqinda shunday tadbirlardan biri Seyitnazar Seydi nomidagi Turkman davlat pedagogika instituti tomonidan tashkil etildi. «O‘qituvchilarning kasbiy malakasini rivojlantirishning zamonaviy usullari: ilmiy tadqiqotlar va yangi yondashuvlar» nomli onlayn seminar so‘nggi ilm-fan yutuqlarini, zamonaviy texnologiyalarni ta’lim tizimiga keng joriy etish, raqamli tizimda o‘tkaziladigan amaliy va tajriba darslarining samaradorligini jahon standartlariga muvofiq oshirish, pedagoglarning kasbiy mahoratini rivojlantirish kabi muhim yo‘nalishlarga bag‘ishlandi.

Seminarda Turkmaniston Ta’lim vazirligi Milliy ta’lim instituti, Magtymguly nomidagi Turkman davlat universiteti, Turkman davlat jismoniy tarbiya va sport instituti, Hydyr Deryaýew nomidagi pedagogika maktabi, Berdimuhamet Annaýew nomidagi Arkadag shahar pedagogika o‘rta kasb-hunar maktabi, shahar va viloyat Ta’lim boshqarmalariga qarashli malaka oshirish markazlari, umumta’lim maktablari, maktabgacha ta’lim muassasalari o‘qituvchilari, tarbiyachilar va mutaxassislar ishtirok etdilar.

Chiqishlarda o‘qituvchilarning va tarbiyachilarning kasbiy mahoratini ilmiy tadqiqotlar va yangi yondashuvlar asosida rivojlantirish, innovatsion texnologiyalar va ilg‘or ish tajribasini o‘quv jarayoniga joriy etish, o‘quv dasturlari, kitob va qo‘llanmalarni ishlab chiqish, dars mazmuni va uni o‘qitish metodikasini takomillashtirish masalalari ko‘rib chiqildi. Shuningdek, ustoz-shogird tizimini mustahkamlash va bu boradagi yangi yondashuvlar muhokama qilindi.

Kun ikkinchi yarmida seminar quyidagi bo‘limlarda davom etdi: «STEM metodikasining tabiiy va aniq fanlarni o‘qitishda nazariy-amaliy asoslari», «Insonparvar fanlarni o‘qitishda zamonaviy pedagogik usullarning o‘rni», «Tillerni o‘qitishda innovatsion usullar va pedagogik mahorat», «Milliy tarbiya an’analari – aqliy va jismoniy rivojlanishning ajralmas yaxlitligi». Ishtirokchilar tadbirlarning faol xarakterga ega ekanini va o‘zlarini qiziqtirgan savollarga aniq javoblar olganliklarini ta’kidladilar.

Seminarga qatnashganlar Gahryman Arkadagimiz va hurmatli Prezidentimizga mamlakatimiz ta’lim tizimini rivojlantirish uchun keng imkoniyatlar yaratganliklari uchun samimiy minnatdorchilik bildirdilar.