Ona muqaddasligiga ehtirom

Kecha Jamoat tashkilotlari markazida Xalqaro xotin-qizlar kuni munosabati bilan “Ona allasi — eng mukammal asar” mavzusida tantanali konferensiya bo‘lib o‘tdi. Turkmaniston Xalq Maslahati, Mejlis, Madaniyat vazirligi, Turkmanistonning YUNESKO ishlari bo‘yicha milliy komissiyasi kotibiyati va Xotin-qizlar birlashmasi Markaziy kengashi tomonidan hamkorlikda tashkil etilgan anjumanda bugungi kunda xotin-qizlar hunarmandchiligini rivojlantirishga berilayotgan yuksak e’tibor haqidagi ma’ruzalar tinglandi.

Kuy-qo‘shiqlar bilan davom etgan tantana san’atkorlar ishtirokida tayyorlangan adabiy-musiqiy kompozitsiya bilan boshlandi. Unda mamlakatimiz xotin-qizlarining ijtimoiy hayotning turli sohalarida olib borayotgan ishlari, qo‘l mehnati namunalarining avloddan-avlodga o‘tishi, odob-axloq va oilaviy qadriyatlarning ahamiyati haqidagi chiqishlar o‘z aksini topdi. Tantanali anjuman davomida so‘zga chiqqanlar yurtimizda ayollarga ko‘rsatilayotgan ehtirom, ularning hunarmandchiligi ahamiyati, onalarimiz farzand tarbiyasiga xalqimizning ezgu an’analariga tayangan holda juda mas’uliyat bilan yondashayotganliklari haqida to‘xtalib o‘tdilar. Bunda yoshlarni tarbiyalashda ayollarning mehri va ularning tarbiya borasidagi tamoyillari muhim o‘rin tutishi ta’kidlandi. Vatanimizda aziz onalarimizga, xotin-qizlarimizga bo‘lgan yuksak hurmat-ehtiromning ildizlari ming yilliklarga borib taqaladi.

Konferensiya davomida yangragan qo‘shiq va kuylarda mamlakatimizda ayol qadr-qimmati yuksak e’zozlanishi, ularning farzandlarni milliy ruhda tarbiyalashdagi o‘rni o‘z ifodasini topdi. Bugungi kunda asrlar qa’ridan sarchashma olgan ushbu asil tamoyillar va ezgu an’analar zamonaviy darajada rivojlantirilmoqda. Ayniqsa, chiqishlarda ona allasining muqaddasligi, unda insonning baxtli hayoti haqidagi orzu-umidlar bayon etilishi haqida so‘z yuritildi. Shuningdek, so‘zga chiqqanlar mamlakatimiz xotin-qizlarining faoliyati va ijodiga bo‘lgan ehtirom davlat siyosatining ustuvor yo‘nalishlaridan biriga aylanganini ta’kidladilar.

Jamiyatning uyg‘un rivojlanishida, milliy birdamligimiz va jipsligimizni yanada mustahkamlashda, yosh avlodni vatanparvarlik, oilaga sadoqat ruhida tarbiyalashda onalar mehnatining o‘rni beqiyosligini qayd etib, so‘zga chiqqanlar ushbu ishlarning yanada rivojlanishiga davlat darajasida katta ahamiyat berayotganliklari uchun muhtaram Prezidentimizga va Qahramon Arkadag‘imizga minnatdorlik bildirdilar.