O‘zbekiston Prezidenti BMTning Awaza forumida ishtirok etish uchun Turkmanistonga tashrif buyuradi

O‘zbekiston Respublikasi Prezidenti Shavkat Mirziyoyev Turkmaniston Prezidenti Serdar Berdimuhamedovning taklifiga binoan 4–5-avgust kunlari ishchi tashrif bilan Turkmanistonga keladi. Tashrif doirasida u BMTning Dengizga chiqish imkoniyati bo‘lmagan rivojlanayotgan davlatlar bo‘yicha uchinchi xalqaro anjumanida ishtirok etadi. Bu haqda O‘zbekiston Prezidentining Matbuot xizmati xabar berdi.

Avval xabar qilinganidek, Hazar dengizi sohilida joylashgan “Awaza” milliy turizm zonasida bo‘lib o‘tadigan forumda BMT Bosh kotibi Antoniu Guterrish, shuningdek, xorijiy davlat va hukumat rahbarlari, xalqaro va mintaqaviy tashkilotlar vakillarining ishtiroki kutilmoqda.

Anjuman kun tartibida quyidagi dolzarb masalalar muhokama qilinadi: transport bog‘liqligini kuchaytirish, savdo jarayonlarini soddalashtirish, iqtisodiy o‘sishni ta’minlash, iqlim o‘zgarishi va atrof-muhitga oid muammolarga qarshi barqarorlikni oshirish. Shuningdek, Barqaror rivojlanish maqsadlariga erishishda qo‘lga kiritilgan yutuqlar ko‘rib chiqiladi. Forum yakunida dengizga chiqish imkoniyati bo‘lmagan rivojlanayotgan davlatlar uchun mo‘ljallangan "Awaza Harakatlar dasturi" qabul qilinishi rejalashtirilgan.

Tashrif davomida Prezident Shavkat Mirziyoyev Markaziy Osiyo davlat rahbarlarining yettinchi maslahat uchrashuviga tayyorgarlik masalalariga bag‘ishlangan tadbirda ham ishtirok etadi, shuningdek, bir qator ikki tomonlama uchrashuvlar o‘tkazishi rejalashtirilgan.