Ozon Turkmanistonga tovarlarni yetkazib berish bo‘yicha hamkorlik imkoniyatlarini o‘rganmoqda

Rossiyaning «Ozon» internet bozori Turkmaniston hududiga tovarlarni yetkazib berish bo‘yicha hamkorlik qilish imkoniyatlarini o‘rganmoqda. Bu haqda kompaniya matbuot xizmatiga tayanib, TASS agentligi xabar berdi.

«Biz xizmatimizning ish geografiyasini yaqin davlatlar bo‘ylab kengaytirishni davom ettirmoqdamiz va Turkmaniston hududiga tovarlarni yetkazib berish bo‘yicha hamkorlik imkoniyatlarini o‘rganyapmiz. Ushbu mamlakatda xizmatni ishga tushirish haqida gapirishga hali erta, mijozlar uchun ushbu xizmat to‘liq tayyor bo‘lganida biz bu haqda qo‘shimcha xabar beramiz», — deyiladi bayonotda.

Hozirgi vaqtda «Ozon» Ozarbayjon, Armaniston, Belarus, Qozog‘iston va O‘zbekistonda logistika infratuzilmasini faol rivojlantirmoqda. Ushbu mamlakatlarning har birida buyurtmalarni qabul qilish punktlari faoliyat ko‘rsatmoqda, mahalliy sotuvchilarga esa platformada ro‘yxatdan o‘tish imkoniyati yaratilgan.