Prezident: Xalqaro xotin-qizlar kuni munosabati bilan viloyatlarda rejalashtirilgan tadbirlar yuqori saviyada o‘tkazilishi lozim

Kecha Turkmaniston Prezidenti Serdar Berdimuhamedov Vazirlar Mahkamasi Raisining o‘rinbosari T.Atahalliyev va viloyat hokimlari ishtirokida ishchi majlis o‘tkazdi. “Watan” axborot dasturida xabar berilishicha, majlisda mamlakat agrosanoat majmuasi va viloyatlarda amalga oshirilayotgan ishlar bilan bog‘liq masalalar ko‘rib chiqildi.

Viloyat hokimlari davom etayotgan mavsumiy qishloq xo‘jaligi ishlari bo‘yicha hisobot berdilar. Ta’kidlanganidek, hozirgi vaqtda bug‘doy maydonlarida agrotexnik me’yorlarga muvofiq parvarishlash, xususan, mineral o‘g‘itlar bilan oziqlantirish ishlari olib borilmoqda. Paxta ekishga tayyorgarlik doirasida haydov ishlari yakuniy bosqichda bajarilmoqda. Shu bilan birga, yerlarni tekislash, ariq tortish va tuproqni boyitish ishlari davom etmoqda. Dehqonlarni sifatli chigit bilan ta’minlash, texnikalarni ta’mirlash bo‘yicha zarur choralar ko‘rilmoqda. Shuningdek, oziq-ovqat ekinlarining bahorgi ekishiga tayyorgarlik ko‘rilmoqda. Xalqaro xotin-qizlar kuni munosabati bilan o‘tkaziladigan madaniy tadbirlar hamda joriy yilda foydalanishga topshirilishi rejalashtirilgan inshootlardagi qurilish ishlari haqida ham ma’lumot berildi.

Prezident hisobotlarni tinglab, mavsumiy ishlarning ahamiyatiga yana bir bor e’tibor qaratdi. Paxta maydonlarini tayyorlash, Dashoguz va Lebap viloyatlarida sho‘r yuvish ishlarini o‘tkazish, paxtakorlarni urug‘ bilan ta’minlash va texnikalarni sozlash muhimligini ta’kidladi. Kartoshka va poliz ekinlari ekishiga yaxshi tayyorgarlik ko‘rishni topshirdi. Shuningdek, xizmat ko‘rsatuvchi korxonalarning ishlab chiqaruvchilar bilan hisob-kitoblarini qat’iy nazorat qilishni buyurdi. Prezident Serdar Berdimuhamedov bayram tadbirlarini yuqori darajada tashkil etish va qurilayotgan ob’ektlarni o‘z vaqtida bitirish bo‘yicha tegishli topshiriqlar berdi.