Prezidentimiz Vazirlar Mahkamasining raqamli tizim orqali majlisini o‘tkazdi
Kecha Prezidentimiz Serdar Berdimuhamedov raqamli tizim orqali Vazirlar Mahkamasining navbatdagi majlisini o‘tkazdi. Unda davlat hayotining ustuvor yo‘nalishlariga nazar tashlanib, bir qator muhim qarorlar qabul qilindi.
Majlis raisi D.Gulmanova yurtimizning qonunchilik bazasini takomillashtirish bo‘yicha olib borilayotgan ishlar, jumladan, milliy kodekslarimiz va qonunlarimizga kiritilishi ko‘zda tutilgan o‘zgartirishlar hamda qo‘shimchalar haqida hisobot berdi. Shuningdek, BMTning yurtimizda ishlayotgan tuzilmalari bilan hamkorlikda o‘tkazilayotgan tadbirlar haqida ma’lumot berildi. Davlat rahbari davr talabiga mos keladigan yangi qonun loyihalarini ishlab chiqishni davom ettirish zarurligini ta’kidladi.
Hukumat a’zolarining hisobotlarida iqtisodiyotning turli sohalarini rivojlantirishga qaratilgan choralar keng yoritildi. Xususan, Iqtisodiy hamkorlik bo‘yicha turkman-slovak qo‘shma guruhini tuzish va uning birinchi majlisini o‘tkazish bo‘yicha ko‘rilayotgan tayyorgarlik ishlari, neft-gaz sohasidagi hamkorliklar, shuningdek, qishloq xo‘jaligi sohasidagi mavsumiy ishlarning borishi muhokama qilindi. Prezidentimiz g‘alla o‘rim-yig‘imini yuqori tashkilotchilik darajasida o‘tkazishni va g‘o‘za maydonlaridagi parvarish ishlariga nazoratni kuchaytirishni topshirdi.
Majlisda sanoat, qurilish va to‘qimachilik sohalarining moddiy-texnika bazasini mustahkamlash, ishlab chiqarishni uzluksiz ishlashini ta’minlash va raqobatbardosh mahsulotlar hajmini oshirish bo‘yicha takliflar bildirildi. Davlat rahbari bu takliflarni ma’qullab, tegishli hujjatlarga imzo chekdi.
Madaniyat haftaligiga ko‘rilayotgan tayyorgarlik ishlari ham majlis kun tartibining muhim qismi bo‘ldi. Bolqon viloyatida 22-27-iyun oralig‘ida o‘tkaziladigan ushbu tantanali tadbirni yuqori darajada tashkil etish bo‘yicha topshiriqlar berildi.
Shuningdek, yurtimizda keng nishonlanadigan Fanlar kuni munosabati bilan ilm-fan tizimini rivojlantirishga qaratilgan “Turkmanistonda ilm-fan, texnika va texnologiyalarning yutuqlarini targ‘ib qilish bo‘yicha 2026—2030-yillar uchun Davlat dasturi” tasdiqlandi.
Tashqi siyosat masalalariga to‘xtalar ekan, Malayziya Bosh vazirining Turkmanistonga bo‘ladigan rasmiy tashrifiga ko‘rilayotgan tayyorgarlik ishlari haqida hisobot berildi. Bu tashrif ikki do‘st mamlakat o‘rtasidagi munosabatlarni sifat jihatidan yangi darajaga olib chiqishga yordam berishi ta’kidlandi.
Majlisda transport va aloqa tizimini takomillashtirish bo‘yicha ham bir qator muhim qarorlar qabul qilindi. Prezidentimiz majlisni yakunlab, xalqimizni Fanlar kuni bilan tabrikladi va yurtimizning bundan buyon ham ravnaq topishi yo‘lidagi ishlarida muvaffaqiyatlar tiladi.
