PSJ ketma-ket ikkinchi marta Yevropaning eng kuchli jamoasi bo‘ldi
Fransiyaning “Pari Sen-Jermen” (PSJ) futbol jamoasi Chempionlar ligasi finalida Angliyaning “Arsenal” jamoasini mag‘lub etib, kubok sohibiga aylandi. Budapesht shahridagi “Pushkash Arena” stadionida bo‘lib o‘tgan ushbu hal qiluvchi uchrashuvni germaniyalik hakam Daniel Zibert boshqarib bordi.
Keskin kurashlar ostida o‘tgan o‘yinning asosiy vaqti va har biri 15 daqiqadan iborat bo‘lgan qo‘shimcha bo‘limlari 1:1 hisobidagi durang bilan yakunlandi. Uchrashuvning 6-daqiqasida londonliklarning hujumchisi Kay Haverts hisobni ochishga muvaffaq bo‘ldi. Parijliklar ushbu golga 65-daqiqada javob qaytardilar; gruziyalik yarim himoyachi Xvicha Kvarasxeliya ishlagan penaltini Usmon Dembele aniq amalga oshirib, hisobni tenglashtirdi. G‘olibni aniqlash uchun o‘tkazilgan 11 metrlik jarima zarbalari seriyasida esa parijliklarning omadi chopdi va ular 4:3 hisobida g‘alaba qozondilar. Ushbu tarixiy uchrashuvda PSJ darvozasini rossiyalik darvozabon Matvey Safonov qo‘riqladi. O‘yinning eng yaxshi futbolchisi deb esa fransuz klubining portugaliyalik yarim himoyachisi Vitinya saylandi.
O‘tgan mavsumdagi finalda Italiyaning “Inter” jamoasini 5:0 hisobida mag‘lub etgan PSJ, bu safar ham chempionlikni himoya qilib, ketma-ket ikki yil Yevropaning eng kuchli jamoasi degan nomni saqlab qolishni uddaladi. Bundan avval Chempionlar ligasi tarixida faqat Ispaniyaning “Real Madrid” jamoasi ketma-ket chempion bo‘lishni uddalagan edi.
Bundan tashqari, ushbu tarixiy o‘yinni sport dunyosining taniqli rahbarlari, shu jumladan FIFA prezidenti Janni Infantino hamda Xalqaro Olimpiya qo‘mitasining sobiq rahbari Tomas Bax bevosita joyida tomosha qildilar.
Shunday qilib, Chempionlar ligasi g‘olibi PSJ 2026-yilgi UEFA Superkubogi uchun kechadigan bahsda Yevropa ligasi g‘olibi Angliyaning “Aston Villa” jamoasi bilan to‘qnash keladi. Ushbu musobaqa shu yilning 12-avgustida Avstriyaning Zalsburg shahridagi “Red Bull Arena” stadionida bo‘lib o‘tadi.
