Qoraqum sahrosining mard o‘g‘lonlari

Ajdodlarimiz bejizga: “Qishning kuni qirq xil bo‘ladi, barchasi ham qattiq,” deb aytmagan. Darhaqiqat, qish kunlari ba’zan yomg‘irli, ba’zan esa shamolli bo‘lib, bir-birini tez-tez almashtirib turadi. Shu sababli qish uzoq yaylovlarda mehnat qilayotgan fidoyi chorvadorlar hayotida katta sinov hisoblanadi. Ammo har bir faslga puxta tayyorlanishni o‘zining muqaddas burchi deb biladigan insonlar uchun hech qanday qiyinchilik yengib bo‘lmas emas — ular tabiatning shafqatsiz sinovlarini sharaf bilan yengib o‘tadilar. Viloyatimiz chorvachilik xo‘jaliklarida bunday fidoyi chorvadorlar ko‘p.

Halaç tumanidagi “Garagum” chorvachilik xo‘jaligi viloyatimizdagi ilg‘or xo‘jaliklardan biri hisoblanadi. Bu yerda mehnat qilayotgan zahmatkash chorvadorlarning yil sayin erishayotgan natijalari quvonarli. O‘tgan yilda ham ular qo‘zi va uloq olishda, jun yetishtirishda yuqori ko‘rsatkichlarga erishdilar. Bugungi kunda chorvadorlar mollarni qishda to‘q va iliq saqlash, ularni qishdan talafotsiz olib chiqish uchun tinimsiz mehnat qilmoqdalar. Sovuq paytlarda qo‘shimcha yem berish uchun 421 tonna ozuqa zaxirasi tayyorlandi. Shuningdek, yaqinlashib kelayotgan qo‘zilash va uloqlash mavsumiga ham puxta tayyorgarlik ko‘rilmoqda.

— Yaylovlarimiz qishloqdan 150 kilometr uzoqlikda, Qoraqum sahrosining ichkarisida joylashgan. U yerda 23 ta qo‘y podasi mavjud bo‘lib, xo‘jaligimizda jami 6 667 bosh qo‘y qishlatilmoqda. Ular bu sohada katta tajribaga ega bo‘lgan 23 nafar ijarachi cho‘ponlarga biriktirilgan. Shu bois har bir cho‘pon o‘z ishiga mas’uliyat va mehr bilan yondashadi. O‘tgan Xalqaro tinchlik va ishonch yilini ham yaxshi natijalar bilan yakunladik. Har 100 bosh ona qo‘ydan 102 tadan qo‘zi olib, rejani 102 foizga bajardik. Ayniqsa, tajribali cho‘ponlar Nurmurod Allaberdiev, Chori Begmurodov, G‘urban Jumag‘uliev yuqori natijalarga erishib, boshqalarga namuna bo‘ldilar, — deydi xo‘jalik rahbari Baxtiyor Xudayquliyev.

Xo‘jalik chorvadorlari joriy — “Mustaqil, doimiy betaraf Turkmaniston — shiddatli tulporlar va ulug‘ maqsadlar yurti” yiliga ham katta ishonch bilan qadam qo‘ydilar. Yilning ilk kunlaridan boshlab ular mamlakat chorvachilik sohasini rivojlantirishga munosib hissa qo‘shmoqdalar. Hozirgi kunda qo‘ylar iliq qoralarda qishlatilmoqda, sovuq havoda esa pana joylarda boqilmoqda. Ozuqa yetarli miqdorda tayyorlangan. Nafaqat “Borjak”, “Mag‘tymquli”, “Bukri”, “G‘ayali bobo”, “Garatagan” quduqlari atrofidagi sero‘t yaylovlarda boqilayotgan qo‘ylar, balki qolganlari ham yaxshi holatda, — deya ta’kidlaydi xo‘jalik rahbari.