Qozog‘istonning savdo siyosatini rivojlantirish markazi QazTrade Ashxobod shahrida Qozog‘istonda ishlab chiqariladigan tovarlarni namoyish etish uchun doimiy savdo-ko‘rgazma maydonchasini yaratishga kirishdi. Yangi maydoncha turkmanistonlik importchilarga, distribyutorlik kompaniyalariga va savdo tarmoqlariga qozoq mahsulotlari bilan bevosita tanishish imkonini beradi.

Yangi «Qozog‘iston ofisi»ning poytaxtdagi yirik savdo markazlaridan birida joylashishi kutilmoqda. Hozirgi vaqtda QazTrade qozoq ishlab chiqaruvchilarining mahsulotlarini tanlab olish va ularning namunalarini bir yerga jamlash bo‘yicha ishlarni olib bormoqda.

Ilk bosqichda ko‘rgazma maydonchasida kundalik iste'mol qilinadigan mollar, oziq-ovqat sanoati mahsulotlari hamda uzoq muddat saqlashga yaroqli mahsulotlar namoyish etiladi.

Doimiy ishlaydigan B2B va B2C shaklidagi shourum turkmanistonlik tadbirkorlarga Qozog‘iston ishlab chiqaruvchilari mahsulotlarining turlari va sifati bilan bevosita tanishishga, ishbilarmonlik muzokaralarini o‘tkazishga hamda ta'minot bo‘yicha shartnomalarni vositachilarsiz tuzishga sharoit yaratadi.

Ashxobodda bunday maydonchaning ochilishi Qozog‘istonning milliy brendlarini Markaziy Osiyo bozorlarida ilgari surishga qaratilgan QazTrade dasturining davomidir.

Yangi tashabbus ikki mamlakat ishbilarmon doiralari o‘rtasida to‘g‘ridan-to‘g‘ri aloqalarni rivojlantirishga va Qozog‘iston bilan Turkmaniston o‘rtasidagi savdo-iqtisodiy hamkorlikni yanada kengaytirishga yordam berishi mumkin.