Turkmaniston va Qozog‘iston ommaviy axborot vositalari sohasidagi hamkorlikni rivojlantirish hamda mamlakatlar o‘rtasida axborot almashinuvini kengaytirish yo‘lida yangi qadam tashlamoqda. Shu doirada ikki mamlakat o‘rtasida doimiy faoliyat yuritadigan qo‘shma media kengashini tashkil etish, shuningdek, Qozog‘istonning xalqaro «Silk Way» va «Silk Way Cinema» telekanallarini Turkmanistonda efirga uzatishni yo‘lga qo‘yish rejalashtirilmoqda. Bu haqda «Ratel Media» xabar bermoqda.

Tegishli kelishuv 2026-yil 8-oktabr kuni «Avaza» milliy sayyohlik zonasida imzolandi. Hujjat Qozog‘iston Respublikasi Prezidentining teleradio majmuasi hamda Turkmaniston Televideniye, radioeshittirish va kinematografiya davlat qo‘mitasi vakillari tomonidan imzolandi.

Tashkil etilishi rejalashtirilayotgan media kengashi ikki mamlakat o‘rtasida ommaviy axborot vositalari sohasida doimiy hamkorlikni ta’minlaydigan ilk qo‘shma tuzilmalardan biri bo‘ladi. Yangi mexanizm davlat teleradio kompaniyalari o‘rtasidagi kasbiy aloqalarni mustahkamlashga, axborot va media kontenti sohasida tajriba almashinuvini kengaytirishga ko‘maklashishi kutilmoqda.

«Silk Way» xalqaro telekanali xorijiy tomoshabinlarni Qozog‘iston, Markaziy Osiyo va dunyoning boshqa mintaqalarida sodir bo‘layotgan voqealar bilan tanishtiradi. «Silk Way Cinema» esa kino asarlarini namoyish etishga ixtisoslashgan.

Har ikkala telekanal ham Qozog‘iston Respublikasi Prezidentining teleradio majmuasi tarkibiga kiradi. Ushbu majmua tarkibiga, shuningdek, «Jibek Joly» respublika telekanali, shu nomdagi radiostansiya, «Silk Way Prime» xalqaro telekanali, «Kazinform» axborot agentligi, Hujjatli kino markazi va «TRKLAB» raqamli bo‘limi kiradi.

Yangi kelishuvning amalga oshirilishi Turkmaniston va Qozog‘iston o‘rtasidagi ommaviy axborot vositalari sohasidagi aloqalarni rivojlantirish, ikki mamlakat axborot makonining o‘zaro boyishiga hamda tomoshabinlarning xalqaro media kontentdan foydalanish imkoniyatlarini kengaytirishga hissa qo‘shishi mumkin.