Quvayt Savdo-sanoat palatasi raisi Firas Al-Oda energetika, neft-kimyo, to‘qimachilik sanoati hamda qurilish materiallari ishlab chiqarish mamlakat xususiy sektori uchun qiziqish uyg‘otadigan sohalar ekanini ta’kidladi va bu yo‘nalishlardagi hamkorlikda Turkmanistonning strategik ahamiyatini qayd etdi. Bu haqda Firas Al-Oda dushanba kuni Al-Quvayt shahrida Turkmaniston Savdo-sanoat palatasi raisi Mergen Gurdov boshchiligidagi turkman delegatsiyasi bilan o‘tkazilgan uchrashuvda ma’lum qildi.

“KUNA” nashrining xabar berishicha, Al-Oda iqtisodiy hamkorlikning yangi yo‘nalishlarini ochish hamda Turkmaniston bilan sheriklikni mustahkamlash zarurligini ta’kidladi.

Quvayt Savdo-sanoat palatasida turkman iqtisodiy delegatsiyasi sharafiga tashkil etilgan qabul marosimida Al-Oda so‘zga chiqib, ushbu uchrashuv ikki mamlakat kompaniyalari o‘rtasida to‘g‘ridan-to‘g‘ri ishbilarmonlik aloqalarini o‘rnatish, qo‘shma loyihalarni rag‘batlantirish hamda uzoq muddatli hamkorlikni yo‘lga qo‘yish uchun amaliy maydon bo‘lib xizmat qilishini aytdi.

O‘z navbatida, Turkmaniston Savdo-sanoat palatasi raisi Mergen Gurdov Quvayt Savdo-sanoat palatasi bilan hamkorlik bo‘yicha bayonnoma imzolashga hamda tegishli tuzilmalar bilan aloqalarni rivojlantirishga mamlakat qiziqish bildirayotganini ma’lum qildi. Shuningdek, u Ko‘rfaz mamlakatlari bozorlariga chiqishda Quvaytning strategik jihatdan muhimligini ta’kidladi.

Uchrashuv doirasida turkman tovarlari, sayyohlik ob’ektlari, sanoat korxonalari hamda mamlakatning texnologik kompaniyalariga bag‘ishlangan multimedia taqdimoti o‘tkazildi.