Rossiya Turkmanistonning betaraflik siyosatini yuqori baholaydi

Kecha Turkmaniston Tashqi ishlar vazirligida tashqi ishlar vaziri Rashid Meredov hamda Rossiya Federatsiyasi tashqi ishlar vaziri o‘rinbosari Mixail Galuzin o‘rtasida uchrashuv bo‘lib o‘tdi.

Turkmaniston tashqi siyosat idorasi xabariga ko‘ra, muzokaralar davomida tomonlar turkman-rus strategik hamkorligini yanada chuqurlashtirishga sodiqliklarini tasdiqladilar. Ikki tomonlama munosabatlarni rivojlantirishda oliy darajadagi muntazam tashriflar va uchrashuvlarning hal qiluvchi ahamiyatga ega ekani ta’kidlandi.

Rossiya Federatsiyasi tashqi ishlar vaziri o‘rinbosari Turkmanistonning doimiy betaraflik maqomiga muvofiq xalqaro maydondagi faoliyatiga yuqori baho berdi.

Uchrashuv davomida siyosiy-diplomatik, savdo-iqtisodiy hamda madaniy-gumanitar sohalardagi ikki tomonlama hamkorlikning asosiy masalalari muhokama qilindi.

Turkmaniston va Rossiyaning xalqaro maydondagi, avvalo Birlashgan Millatlar Tashkiloti doirasidagi, o‘zaro hamkorligining faolligi qayd etildi. Hamkorlikning boshqa formatlari qatorida Mustaqil Davlatlar Hamdo‘stligi alohida ta’kidlanib, joriy yilda Turkmaniston unga raislik qilayotgani aytib o‘tildi.

Tomonlar xalqaro va mintaqaviy kun tartibidagi muhim masalalar yuzasidan ham fikr almashdilar.