Sardor Azmun Eronning Jahon chempionatida ishtirok etadigan tarkibidan chiqarildi
Mashhur hujumchi Sardor Azmun AQSh, Kanada va Meksika yashil maydonlarida bo‘lib o‘tadigan futbol bo‘yicha 2026-yilgi Jahon chempionatida ishtirok etadigan Eron milliy terma jamoasining yakuniy tarkibiga kiritilmadi. Milliy terma jamoaning rasmiy ijtimoiy tarmoqlarida e’lon qilingan 26 ta futbolchidan iborat rasmiy ro‘yxatda tajribali hujumchining ismi joy olmadi.
Rossiyaning “Rubin Kazan”, “Rostov” va “Zenit Sankt-Peterburg” kabi taniqli klublaridagi samarali o‘yinlari bilan tanilgan Azmun, 2025-yilning mart oyidan buyon Eronning bosh jamoasiga chaqirilmadi. U hatto Jahon chempionati arafasida e’lon qilingan kengaytirilgan dastlabki ro‘yxatga ham qo‘shilmadi.
Xalqaro ommaviy axborot vositalarining taxminlariga ko‘ra, ushbu kutilmagan qaror ortida futbolchining Birlashgan Arab Amirliklari rasmiy vakillari bilan tushgan suratlari ijtimoiy tarmoqlarda tarqalishi kabi sportdan tashqari sabablar yotibdi.
Azmun esa o‘zining ijtimoiy tarmoqlardagi sahifalarida Eron “uning yuragi va faxri” bo‘lib qolishini ta’kidlab, milliy terma jamoaga jahon chempionatida muvaffaqiyatlar tiladi.
Futbol bo‘yicha Jahon chempionati shu yilning 11-iyuni — 19-iyuli oralig‘ida tashkil etiladi. Musobaqaning “G” guruhida bahslashadigan Eron milliy terma jamoasi guruh bosqichi doirasida 15-iyunda Yangi Zelandiya, 21-iyunda Belgiya va 26-iyunda Misr terma jamoalari bilan uchrashadi.
