TIV: Turkmanistondagi MDH sammitlari Hamdo‘stlik doirasidagi hamkorlikni mustahkamlashga hissa qo‘shadi

2026-yilda Turkmanistonda bo‘lib o‘tadigan MDH Davlat rahbarlari kengashi va Hukumat rahbarlari kengashi Hamdo‘stlik doirasidagi hamkorlikni yanada mustahkamlashga muhim hissa qo‘shadi. Bu haqda Turkmaniston tashqi ishlar vaziri o‘rinbosari Mahri Bashimova Rossiya Federatsiyasi elchixonasida RF Diplomatik xodimlar kuniga bag‘ishlangan tantanali qabul marosimida ma’lum qildi.

«Bu yil Turkmaniston MDHda raislik qilmoqda va shu munosabat bilan tashkilotga a’zo mamlakatlar ishtirokida bir qator muhim tadbirlarni tashkil etish rejalashtirilgan. Mamlakatimizda o‘tkaziladigan Hamdo‘stlik Davlat rahbarlari kengashi va Hukumat rahbarlari kengashi ushbu formatdagi hamkorlikni yanada mustahkamlash ishiga muhim hissa qo‘shishiga ishonaman», dedi M. Bashimova.

Vazir o‘rinbosari Turkmaniston va Rossiya o‘rtasida mustahkam ishonch tuyg‘usi shakllanganini ta’kidladi. «Bu bizga hamkorlikni ham davlatlararo darajada, ham asosiy xalqaro tashkilotlar doirasida izchil mustahkamlash imkonini beradi», deb qo‘shimcha qildi u.

M. Bashimovaning so‘zlariga ko‘ra, ikki davlat rahbarlari o‘rtasidagi yuqori darajadagi shaxsiy aloqalar muvaffaqiyatning asosiy ustunidir. «Yuqori darajadagi muntazam uchrashuvlar eng keng ko‘lamli yo‘nalishlar bo‘yicha birgalikdagi ishlarimizning jadallashishiga katta turtki bermoqda», dedi diplomat.

Shuningdek, vazir o‘rinbosari Rossiyaning Ashxoboddagi elchixonasi xodimlariga faol va samarali mehnatlari uchun minnatdorchilik bildirdi.