“Tohkemy Corporation” Turkmanistonda suvni chuchuklashtirish loyihalarini o‘rganmoqda

Yaponiyaning “Tohkemy Corporation” kompaniyasi Turkmanistonda suvni chuchuklashtirish bo‘yicha o‘rta va kichik hajmdagi loyihalarni amalga oshirishni maqsad qilgan. Kompaniya qishloq joylarida suvni tozalash va ekologik infratuzilmani rivojlantirishga alohida e’tibor qaratmoqda. Bu haqda kompaniyaning savdoni rag‘batlantirish bo‘yicha menejeri Misunori Yamadzumi “Trend” agentligiga bergan intervyusida aytib o‘tdi.

Misunori Yamadzumining so‘zlariga ko‘ra, suvni tozalash, shu jumladan suvni chuchuklashtirish kompaniyaning Turkmanistondagi faoliyatining asosiy yo‘nalishidir. Yirik hajmdagi loyihalarni amalga oshirish esa Yaponiyaning yetakchi korporatsiyalari bilan hamkorlikda ko‘zda tutilgan.

“Tohkemy Corporation” kompaniyasi 2025-yilning aprel oyida Turkmanistonning Oguz xon nomidagi Muhandislik-texnologiyalar universiteti bilan suvni tozalash sohasini rivojlantirish bo‘yicha ma’lumot almashish va aniq takliflar tayyorlashni nazarda tutuvchi o‘zaro anglashuv memorandumi imzoladi.

Kompaniya kelgusi hamkorlik doirasida Turkmanistonda loyihalarni amalga oshirishni va ushbu loyihalarni uskunalar bilan ta’minlashni rejalashtirmoqda.

Osakada joylashgan “Tohkemy Corporation” kompaniyasi 1965-yilda tashkil etilgan bo‘lib, u ichimlik suvi, sanoat hamda shahar suv ta’minoti uchun kompleks yechimlarni ishlab chiqadi.