Tojikiston va O‘zbekiston Xitoy–Yevropa multimodal transport yo‘lini ishga tushiradi

Tojikiston va O‘zbekiston Xitoy–Tojikiston–O‘zbekiston–Turkmaniston–Eron–Turkiya–Yevropa yo‘nalishidagi multimodal transport yo‘lagining sinov loyihasini amaliyotga tatbiq etishni boshladi.

Tojikiston Respublikasi Transport vazirligi xabariga ko‘ra, transport yo‘lini ishga tushirish bo‘yicha qaror ikki davlat transport vazirlari o‘rtasida o‘tkazilgan muzokaralar natijasida qabul qilindi.

Loyihaning birinchi bosqichida O‘zbekistondan to‘liq yuklangan o‘n dona yuk mashinasi Tojikiston orqali Xitoyga sinov tariqasida yuboriladi.

Tomonlar yangi multimodal transport yo‘lagi bo‘yicha yuk tashish ishlarini birgalikda boshlashga va yuk tashish ruxsatnomalarini elektron shaklga o‘tkazishga kelishib oldi.

Ushbu yo‘l birinchi marta 2022 yilda Dushanbe shahrida mintaqaviy logistika rivojiga bag‘ishlangan xalqaro konferensiyada taqdim etilgan edi.