Toshkent shahrida yil shiori munosabati bilan tadbir va Turkmaniston Prezidentining «Turkmaniston neytralitetining tinchlik va ishonchga eltuvchi ravshan yo‘li» nomli kitobi taqdimoti bo‘lib o‘tdi

2026-yil 13-fevral kuni Turkmanistonning O‘zbekiston Respublikasidagi Elchixonasi binosida 2026-yilning «Mustaqil, Boqiy Neytral Turkmaniston — bedov otlar shiddatli orzular makoni» deb nomlangan shioriga bag‘ishlangan tadbir hamda Turkmaniston Prezidentining «Turkmaniston neytralitetining tinchlik va ishonchga eltuvchi ravshan yo‘li» nomli kitobining taqdimot marosimi o‘tkazildi. Bu haqda Turkmaniston TIV veb-saytida xabar berilgan.

Tadbirda O‘zbekiston Respublikasi Oliy Majlisi Qonunchilik palatasi deputati, Respublika turkman madaniyat markazi rahbari, turkman diasporasi vakillari, O‘zbekistonning oliy o‘quv yurtlarida tahsil olayotgan turkman talabalari hamda Elchixona xodimlari ishtirok etdilar.

Turkmanistonning O‘zbekiston Respublikasidagi Elchisi Sh. Meredov o‘z nutqida 2026-yil shiori 2025-yil — Xalqaro tinchlik va ishonch yilining mantiqiy davomi ekanligini ta’kidladi. Shuningdek, mazkur shiorning mazmun-mohiyati turkman xalqining o‘z ma’naviy va madaniy qadriyatlariga tarixiy sadoqati hamda hozirgi zamon umumbashariy vaziyatlari bilan belgilanishi qayd etildi.

Bundan tashqari, Turkmanistonning 2028-yilni Xalqaro huquq yili deb e’lon qilish haqidagi tashabbusining ahamiyati aytib o‘tildi. Bu tashabbus mamlakatning xalqaro huquq tamoyillariga va huquq ustuvorligiga sodiqligini ko‘rsatadi.

Tadbir doirasida ishtirokchilarga Turkmaniston Prezidentining «Turkmaniston neytralitetining tinchlik va ishonchga eltuvchi ravshan yo‘li» nomli kitobi tanishtirildi, shuningdek uning konseptual va amaliy mazmuni bayon etildi. Nashrda neytralitetning huquqiy va siyosiy asoslari, uning mintaqaviy va global barqarorlikni ta’minlashdagi o‘rni hamda Turkmanistonning tinchlik va ishonch madaniyatini rivojlantirishga qo‘shayotgan hissasi ochib berilgani ta’kidlandi.

Tadbir yakunida ishtirokchilarga turkman milliy taomlari tortiq qilindi.